Xa vai alá máis de un ano en que os cambadeses votamos por última vez. Luís Aragunde fíxose co bastón de mando do Concello cun elevado apoio que o levaron a gobernar con maioría absoluta. Nestes días nos que falamos moito de estatuas, é preciso tamén poñer a vista no que máis importa. O Partido Popular presentouse ás eleccións municipais coa promesa estrela de traballar para loitar contra o desemprego. Os datos un ano máis tarde amosan pouca efectividade, máis ben nula.

En Cambados contábanse no mes de Abril deste ano (último datos do IGE) 1.673 persoas no paro, mentres que no mesmo mes un ano antes esta cifra era de 1.441, é dicir, houbo un aumento do 16.1%. Comparando coa bisbarra e co país, Cambados creou máis paro, xa que no Salnés ese incremento foi do 14.8% e en Galiza do 13.5%.

E é certo que desde un Concello non se teñen todas as ferramentas para crear emprego, pero si hai cuestións nas que o goberno local podería ter incidido. En campaña electoral Luís Aragunde prometeu crear un “viveiro de empresas” no Polígono Industrial, cedendo locais a xóvenes emprendedores para que tiveran o espazo necesario para comezar a súa empresa. Un ano despois, non houbo nin un só paso na dirección de crear este servizo. O propio polígono, segue cun aspecto case desértico (hai pouco coñecíase un informe que criticaba o estado do mesmo) e as parcelas teñen un prezo demasiado elevado porque se empregaron para especular co terreo e non para crear actividade.

O sector do marisqueo é un dos únicos en Cambados que non só non sofre a crise, senón que segue a medrar coa posta en marcha de procesos destinados a contratar máis persoas. Porén, o prometido saneamento da nosa costa segue no caixón cando sería unha mellora clara na produtividade dos nosos bancos marisqueiros.

Aragunde manifestou en precampaña que ás veces “lle custaba comer” ao pensar na xente desempregada. Hoxe, non só o Goberno de Cambados permanece impasíbel ante este tema, senón que segue a malgastar cartos de todos en actividades tan cuestionábeis como Xantar do Albariño, Xantar dos Maiores ou agora nunha estatua a maior gloria do PP.

CLICK CAMBADOS INAUGURA A PRIMEIRA EXPOSICIÓN

Ademais, como xa indicáramos desde CTK hai días, a asociación de fotografía Click Cambados vai presentarse en sociedade inaugurando unha exposición cuxa temática xira entorno a Cambados. Será nun acto público na Praza das Rodas tamén o venres, ás 20.30 horas. Ademais das imaxes, haberá música a cargo de Gerundio Canto.

Finalmente concretouse unha data para concentrarse diante do Concello para rexeitar a decisión unilalteral do Goberno de Cambados de instalar unha estatua de Manuel Fraga Iribarne pagada cos cartos de tod@s. Será o vindeiro sábado, 9 de Xuño, ás 20.30 horas e durante os vindeiros días publicitarase este evento tanto en internet coma pola rúa en forma de carteis e panfletos.

E é que a concentración non se plantexa simplemente como unha protesta, que tamén o é, senón como un evento dirixido a informar á cidadanía de Cambados sobre a iniciativa do Partido Popular de adicarlle ao seu fundador unha estatua pagada por todos e todas nós. Se queres participar nesta campaña contacta en cambadostk@gmail.com ou a través do grupo “NON á estatua de Fraga en Cambados“. Cant@s máis sexamos, moito máis lonxe chegaremos.

Falaba eu cun amigo polo facebook e saíu a célebre frase de Aristóteles de que “o home é un animal político”, “zoon politikón” transcrito do grego. Lembro as miñas clases de filosofía en COU cun estupendo profesor, Xosé Manteiga e como nos dixo que a miúdo se malinterpreta a frase porque Aristóteles non entende político no sentido que nós lle damos a política e actividade política senón no sentido de ‘polis’ ou cidade-comunidade. A polis era para os gregos a comunidade de cidadáns que vivían nela e se autogobernaban e non só a cidade en sentido físico. Do mesmo xeito anos despois tamén os romanos diferenciaban ‘ urbs’ para referirse á cidade romana e ‘cívitas’ para referirse á comunidade de cidadáns; Roma non foi nunca unha democracia pero nos tempos da República (que ven de res pública ou asuntos públicos) tamén un grupo de cidadáns tomaba as decisións de goberno.

O que quero dicir é que a frase de Aristóteles fala de que o home é un animal social ou urbano, que vive en comunidade. E Atenas, que inventou a democracia, entendía esta como unha comunidade de persoas que participaban no goberno. Autarquía, autogoberno son palabras gregas que para eles eran sinónimo de liberdade. A Ekklesía era a asemblea na que se reunían os cidadáns de Atenas e onde se tomaban as decisións importantes.

Menudo rollo estou soltando pero veume á cabeza ao ler un comentario nun xornal sobre a estatua de Fraga. Este cidadán dicía que os que nos opoñíamos á estatua non aceptabamos os resultados das eleccións municipais que deron un claro triunfo ao partido popular e por iso saíamos á rúa. A democracia como todos sabemos é o goberno do pobo e a esencia desta  é que se escoiten todas as voces non só as da maioría, senón isto sería unha ditadura da maioría. A nosa democracia é representativa, nós cedemos o uso do poder a uns representantes, e non directa, como era a grega, onde na Asemblea ou Ekklesía se tomaban as decisión importantes. Pero o feito de elixir a uns representantes non supón darlle un cheque en branco e que co noso voto teñan poder para facer o que queiran, e ademais todos contribuímos cos nosos impostos a soster a comunidade e non só os que gañaron as eleccións. Eu podo entender que non se nos consulte sobre o ancho dos sumidoiros ou sobre onde se van poñer farolas pero para cousas menos técnicas e de máis calado a cidadanía pode e debe ser consultada. Esa estatua, se se fai, espero que non, tamén vou eu a contribuír a pagala. Así que si o goberno municipal non se dignou a consensuar a decisión cos outros partidos elixidos tamén democraticamente eu síntome totalmente lexitimada a manifestarme. Desta crise na que estamos que é  a un tempo económica e política, moita xente está dacordo en que só sairemos de dous xeitos, cara adiante ou cara atrás. Ou se rompe Europa e o Euro ou máis Europa e máis integración. Ou ditadura ou máis democracia e participación cidadá. O futuro o dirá.

 Por certo nas pasadas eleccións o Partido Popular obtivo 5.208 votos, ampla maioría si, pero en Cambados vivimos 13.946 persoas.

Maribel Iglesias. Le todos os seus artigos premendo aquí.
Tamén podes seguila nun blog sobre Asorey ou no blog de xeografía crítica O Umia.

Segundo Agamar o audio recolle unha conversa entre o Patrón Maior e asociados na que recoñece no ano 2009 a disposición irregular de fondos públicos da Confraría de pescadores, a percepción de gratificacións económicas no seu propio beneficio a cargo da entidade, o cobro de percepcións económicas mensuais (2.000 euros) a titulares de bateas pola vixiancia a cargo do persoal da Confraría (cofinanciado pola Consellería exclusivamente para as autorizacións da Confraría), a existencia de contas correntes a nome de persoas particulares nas que se ingresaban “donativos” da Confraría sen precisar, nin declarar e sen figurar na contabilidade oficial e, en xeral, unha sistemática conducta de opacidade que permitía cobros e abonos presuntamente fraudulentos. Todo elo, omitindo o coñecemento por parte dos socios, da Tesourería da Seguridade Social e da Axencia Tributaria.

Máis info. no blog “Cambados Xusto”.

É ben curioso, xa que segundo FARO  ”Una encuesta rápida parece indicar que la mayoría de vecinos está a favor de la estatua”, pero non dan información sobre a suposta enquisa, como tamaño da mostra, método de enquisa, etc. É claro que sen estes datos esa enquisa ten tanta fiabilidade como se desde Cambados(tk) falamos con vinte amigos e titulamos a seguinte nova “A maioría de Cambados oponse á estatua de Fraga”.

Desde CTK consideramos polo tanto importante a convocatoria dunha concentración para a vindeira fin de semana, xa que non só loitamos contra un disparate de medida por parte do Concello senón tamén contra o descoñecemento que se quere implantar na cidadanía de Cambados ao respecto.

Grupo en Facebook contra a iniciativa do Concello. NON á estatua de Fraga en Cambados.

No mundo do viño tampouco a proposta é recollida con fervor. Aínda que desde Condes Albarei o seu presidente amósase a favor e eloxia a figura do ex presidente da Xunta en relación co Albariño, o seu homólogo en Martín Códax non é partidario de erixir o monumento a pesares de que na súa opinión Fraga se portara ben con eles.

“MÁIS DE 15.000 EUROS”

O alcalde, Luís Aragunde, non despexou a incógnita aínda de cal vai ser o prezo que teñamos que pagar pola estatua. Só declarou que serán “máis de 15.000 euros” e que pedirá axuda a outras administracións  para sufragar o custo. Hai que lembrarlle ao señor Aragunde que o feito de que parte dos cartos veñan da Xunta e/ou Deputación non significa que non sexamos, finalmente, os veciños quen paguemos este despropósito que ten como único fin a propaganda particular do PP. Aínda así, unha estatua de iguais características (mesmo material e mesmo esculturor) custou hai un ano 28.000 euros e non 15.000.

Non se descarta a convocatoria de mobilizacións nos próximos días.

Grupo en Facebook contra a iniciativa do Concello. NON á estatua de Fraga en Cambados.

Pola súa banda o Bloque xa rexistrou no Concello preguntas ao alcalde sobre o tema. Para Víctor Caamaño é unha “burla” que o goberno local pida austeridade e lle suba os impostos aos veciños de xeito abusivo para a continuación gastar miles de euros nunha escultura “para mellor gloria do PP”. Para o BNG é claro que a figura de Fraga cando menos non suscita consenso (lembran tamén o seu pasado como ministro de Franco) aínda que todos e cada un dos cambadeses -incluídos os que non queremos a estatua- teremos que pagar por ela.

Tamén desmonta Caamaño o argumento de Aragunde de que Fraga foi fundador da Festa do Albariño, xa que persoeiros da talla de Cunqueiro tamén fundaron a nosa Festa e non gozan de tal recoñecemento. Quizais por non ser do PP, engade Caamaño. Por todo isto o Bloque de Cambados pregunta ao goberno cando e quen aprobou o encargo da estatua a Manuel Fraga Iribarne, canto custará dita escultura e de que partida procederán os cartos para dita obra.

Grupo en Facebook contra a iniciativa do Concello. NON á estatua de Fraga en Cambados.

Daquela os grupos da oposición aceptaron unha modificación do crédito para poder sufragar a escultura aínda que se queixaron de que se enteraran pola prensa de que a estatua estaba xa realizándose. Francisco Asrey, ao contrario que Fraga, suscitaba a unión de todos os grupos e de todos os cambadeses, e non houbo problema para chegar a acordos a pesar das malas formas do Partido Popular. A falla de transparencia volve a ser capital no tema de Manuel Fraga.

Grupo en Facebook contra a iniciativa do Concello. NON á estatua de Fraga en Cambados.

Hai uns días que en Cambados a xente está indignada; está indignada coa proposta do PP de malgastar os cartos públicos nunha escultura de Manuel Fraga; e a verdade é que teñen argumentos e razóns para estalo. Este caso é todo un exemplo de como o goberno municipal do PP está a xestionar este concello e a malgastar os nosos recursos.

O PP toma esta decisión, non só, sen consultalo con ningún outro grupo político (como fai sempre), senón que ademais tenta ocultalo o maior tempo posible. De feito, esta é unha das razóns polas que envían as actas da Xunta de  Goberno con máis de 3 meses de retraso, en lugar dos 10 días que marca a lei. Así o BNG, que forma parte da corporación municipal, ten que coñecer polos medios de comunicación barbaridades como o encargo  desta escultura.

Co agravante de que o PP toma a decisión de encargar a escultura sen ter cartos para elo e, despois de facelo, afirma que tentará conseguilos a posteriori; o cal indica a “excelente planificación” coa que traballa o goberno municipal do PP de Cambados.

Por se isto non fose suficiente, o alcalde manifesta que agarda conseguir os cartos para a estatua de “Don Manuel”, a partir de axudas doutras Administracións. Esta é outra das teimas do PP: ten que enterarse, dunha vez,  Luís Aragunde que os cartos das Administracións son públicos. Son cartos que proceden dos nosos impostos e que merecen ser gastados con sentido común e eficacia para o benestar de todos e todas. Porque os cartos públicos, tamén os da Deputación; eses que Louzán gasta tan alegremente, realmente non son del, senón nosos. E cando son “malxestionados”, como adoita a facelo o PP, está demostrar que non lle doe malgastar os cartos das Administracións, como se estas non tiveran onde investilos. Porque con estas actitudes, semella que sobran cartos para sanidade, educación, servizos sociais, cultura…, ou en saneamento (no caso de Cambados) e como sobran tantos, pois se lle poden facer cos sobrantes unha escultura para maior gloria do exministro de Franco.

Esta decisión do PP  non hai por onde collela, porque nin é momento para tirar os cartos en esculturas como esta, nin se trata dun personaxe que concite o mínimo consenso entre as diferentes sensibilidades políticas e sociais. Isto é simplemente unha “cacicada” do PP de Cambados que con este tipo de decisións está  a situarse, cada día, máis á dereita.

Víctor Caamaño. Voceiro do BNG de Cambados. Podes ler o seu blog premendo aquí.