Tourís

O BNG denuncia que o CIM segue pechado 6 meses ao ano

O BNG de Cambados, por medio do seu portavoz Víctor Caamaño, denuncia outra vez que o Centro de Información á Muller segue funcionando igual que nas dúas últimas lexislaturas: non abre até que a Xunta non envía a subvención, o cal adoita acontecer cunha demora de meses. Seguir lendo »

“Todo o que toquei sempre foi para arriba” di Luís Somoza

A reforma da Cultural adquiriu onte o matiz máis personalista coa re-inauguración da nova sede. Unha inauguración na que tomaron parte o presidente da Asociación, Luís Somoza, o Presidente da Deputación (institución que financiou cun millón de euros a obra), Rafael Louzán, o alcalde Luís Aragunde, o delegado da Xunta Cores Tourís e e deputada do PP Rosa Oubiña. Seguir lendo »

O alcalde desafía á Xunta Electoral e volve “supervisar” unha obra

O alcalde de Cambados visitou onte unhas obras na parroquia de Oubiña e declarou que “non vou marchar 15 días de vacacións pola campaña” en referencia aos avisos dados pola Xunta Electoral de Cambados a el e a Tourís polos continuos incumprimentos da lei electoral vixente. Esta Lei prohibe este tipo de visitas en período electoral que teñen por fin resaltar logros do goberno, pagados con cartos públicos, en beneficio dun partido político. Seguir lendo »

A Xunta Electoral ameaza a Tourís e Aragunde cunha sanción

Unha denuncia deste fin de semana do BNG volve a poñer de manifesto que o PP realiza actos ilegais en campaña, tal e como ditaminou a Xunta Electoral de Zona (XEZ) de Cambados. Hai días acontecía o mesmo coa visita de Tourís á Cultural, e agora trátase da visita do delegado da Xunta e ex alcalde a obras de Beleco e Fefiñáns acompañado do actual rexedor, Luís Aragunde. Segundo a XEZ ambos incurren en actividades prohibidas pola normativa electoral, xa que se trata de visitas a obras financiadas con cartos públicos en campaña electoral. Seguir lendo »

Entrevista aos candidatos. Valoración da lexislatura

Iníciase hoxe a publicación das respostas ás preguntas que Cambados(tk) remitiu aos candidatos á alcaldía de Cambados. Serán dez as cuestións que se plantexan e vanse ir publicando aos poucos, coas preguntas agrupadas máis ou menos coas temáticas que se tratan.

Lamentablemente, igual que en 2007, non contamos coas respostas do candidato do PP. Antes Tourís e agora Aragunde, ignoraron a proposta deste espazo na web a pesar de que foron notificados correctamente, polos mesmos medios e no mesmo prazo que aos demais candidatos.

Pregunta 1. Como valora a xestión do actual goberno? É necesario un cambio?

Luis Aragunde, candidato do PP. Sen resposta

(O candidato do Partido Popular ignorou a proposta de Cambados(tk) a pesar de ter sido notificado en igualdade de condicións que os demais candidatos e polo tanto descoñecemos a súa resposta)

……

Domingo Tabuyo, candidato do PSdeG-PSOE.  O Goberno de Aragunde, é unha fotocopia e goberna ao dictado de Tourís, nin aportou nada novo nin o deixan que o intente. Aragunde limítase a seguir na mesma senda de creerse en posesión da verdade e practica os 4 principios esenciais que Tourís implantou: mentira, insulto, manipulación e publicidade permanente.

Polo tanto a valoración é negativa: prometeron montes e moreas para gañar as eleccións e todo está incumplido:nin temos Centro de Día, nin edificio de servizos sociais, nin transporte adaptado, nin políticas de xoves e maiores, nin Depuradora en Vilariño-Ribadumia,  nin vivenda sociais, nin tan siquera repuxeron o PAC de Pediatria: un engano masivo á cidadanía. Máis información na páxina web do PSOE de Cambados.

Víctor Caamaño, candidato do BNG. O  BNG  fai un balance claramente negativo da xestión do PP no concello de Cambados por moi diversas razóns, entre elas: porque non pensaron no cidadán á hora de facer política e o resultado son 1.500 parados e paradas, porque as súas actuacións no ámbito do marisqueo, comercio e industria foron nefastas para estes sectores, porque paralizaron urbanisticamente o concello, porque non o sanearon, porque o endebedaron por riba do razoable, porque seguen a practicar sen pudor unha política de contratación baseada no “enchufismo “, porque transformaron a festa do Albariño nunha convención do PP, porque ocultan datos públicos á oposición, porque utilizan o concello con finalidade partidista, porque non crearon canles de participación cidadán, porque non tratan por igual a todos e todas, porque benefician economicamente aos seus partidarios…, en fin; e por moitas  cousas máis.

É urxente un cambio de goberno municipal; o Concello de Cambados necesita ser saneado a todos os niveis. Máis información no blog de Víctor Caamaño.

A ENTREVISTA CONTINÚA MAÑÁ CON NOVAS RESPOSTAS

Cores Tourís, o senador galego menos traballador

Así o confirma un pequeno (e moi revelador) estudo que realizou o profesor e blogueiro Filipe Díez. Dito estudo contabiliza toda a actividade dos senadores por Galicia na Cámara Alta durante esta lexislatura.

Xosé Manuel Cores Tourís, actual delegado da Xunta e ex alcalde (integra agora as listas do PP en Cambados nun posto “honorífico”), é xunto con dous compañeiros de partido, o senador menos traballador da cámara. Ao seu favor comentar que só dispuxo do seu escano un dos catro anos de lexislatura, posto que renunciou ao posto no Senado en Abril de 2009, pero aínda así a cifra é lamentable: durante ese ano o único que fixo o señor Tourís en Madrid (parte de cobrar o soldo) foi presentar unha pregunta oral en pleno.

Ademais, na ficha de Tourís no Senado tamén se recollen vinte preguntas ao goberno , estas non están incluidas no estudo de Filipe Díez por non aparecer na fonte consultada por el (tamén oficial). De todas formas, son preguntas asinadas por tres senadores e como comenta o propio Díez son “textos feitos polos gabinetes dos partidos e que o único “traballo” dos senadores é asinalos, polo que o seu valor é en calquera caso moi relativo.”

Se eliminásemos da lista aos senadores que deron baixa antes de rematar a lexislatura -caso de Tourís- o menos traballador sería e ex presidente da Xunta Manuel Fraga con tres intervencións.

E no outro polo, o que máis traballou: o único senador de que dispón o BNG na Cámara Alta. Xose Manuel Pérez Bouza realizou máis comparecencias, intervencións, preguntas…que os 21 senadores galegos de PP e PSOE xuntos, en concreto 408 incluíndo unha proposta de reforma de estatuto. O pequeno estudo de Filipe díez adxunta ademais unhas gráficas que permiten visualizar perfectamente o traballo dos senadores por grupo.

Para ver o estudo do rendemento dos senadores galegos, preme aquí

Filipe Díez publicara semanas atrás, trala pequena campaña do #eurodiputadoscaraduras en Twitter, outro estudo relativo ao rendemento dos deputados europeos. Podes lelo premendo aquí. Como adianto, aproban 9 de 50.

Os principais incumprimentos electorais do PP

Analizáronse dúas pezas de propaganda electoral do Partido Popular, unha do ano 2003 (programa) e outra de 2007.  Nos programas e nas campañas do PP sempre hai unha ou dúas “obras faraónicas” proxectadas, grandes infraestruturas que nunca chegan a cumprir (nalgún caso como o dos portos deportivos, por fortuna, tamén hai que dicir).

Programa 2003

Obra estrela: Proxecto Porto Deportivo. Na última páxina do seu programa, sen ningún tipo de explicación, aparece unha foto de satélite do porto de Tragove ao cal se lle engadiu unha nova parte de espigón (de dimensións considerábeis) e unha gran praia artificial resgardada, mirando a Cambados. Podes premer na fotografía para ampliar.

Outras promesas esquecidas: Unha moi gorda, a da Sede para o Consello Regulador do Viño Albariño, que se supoñía que estaría no Pazo de Torrado e finalmente o PP levou para Pontevedra. Dúas relacionadas: “Solo para vivendas sociais” e “Máis vivendas sociais”, algo que non só non se levou adiante senón que o goberno local rexeitou un plan do bipartito para facer vivenda pública na zona da Grenla.

Unha tamén recurrente: “Aparcamentos soterrados en A Merced, A Xuventude e na Avda. de Galicia (fronte á Sociedade Cultural)”.

Eleccións de 2007

Obras estrela: O PP, na última páxina do boletín que repartiron no propio mes das eleccións, prometía  unha “Área Lúdico-Comercial con zonas verdes e peonís” que incluiría segundo eles “600 plazas de aparcamientos [sic] soterrados e de superficie nas inmediacións da Praza de Abastos” e un “porto deportivo en Sto. Tomé”. Podes ampliar a imaxe premendo nela.

Outra das obras estrela foi o centro de día que os conservadores prometeron construir no antigo matadoiro. A día de hoxe a Xunta non ten consignada unha partida para este fin a pesar de que na Festa do Albariño alcalde e conselleira prometeron outra vez construilo.

A falta do programa completo do PP de 2007 deixamos para outro artigo a análise pormenorizada das propostas incumpridas destes catro anos. Se ti tes o programa podes poñerte en contacto con Cambados(tk) no email cambadostk@gmail.com para facilitárnolo.

Rematar esta publicación cunha frase que José Manuel Cores Tourís escribía na carta electoral aos veciños hai catro anos: “Síntome satisfeito  de poder asegurar que, a diferencia doutros, o Partido Popular sempre cumpre cos seus compromisos”.

Xa é oficial: non haberá voto emigrante

O Senado aprobou onte a iniciativa do Congreso dos Deputados de eliminar o dereito ao voto dos emigrantes nos comicios locais.

Esta medida xa vai afectar ás eleccións municipais de Maio de 2011 e mellora sen dúbida as expectativas de cambio de goberno, xa que tradicionalmente esta partida de votos que chegaban do exterior beneficiaban case en exclusiva ao Partido Popular (en 2007 o PP levouse máis do 75% destes votos, sumando 147 papeletas).

E é unha boa noticia non por iso, senón porque remata coa inxustiza de que un grupo de persoas que descoñecen a realidade dos Concellos decidan en pé de igualdade cos veciños. A veciñanza ten que ser o requisito indispensable para exercer o voto nunhas eleccións municipais.

VIAXES DOS CARGOS DO PP AO EXTERIOR

Queda por ver agora se os cargos do PP seguirán viaxando periodicamente ao exterior para entregar supostas axudas á emigración (e que a oposición calificaba como intercambio de votos por axudas). Aragunde e Tourís viaxaron nalgunha ocasión a Arxentina, na última a súa visita tiña como principal eixo central un Xantar de Confraternidade e o gasto derivado da viaxe foi o triplo da suposta axuda que ían entregar alí.

Aragunde mantén un Xantar dos Maiores sospeitoso de estar politizado

Hoxe La Voz de Arousa faise eco do Xantar dos Maiores, unha comida que o Partido Popular no Goberno Local ten xa instaurada, a pesar do cambio de goberno que levou a Luís Aragunde a facerse co bastón de mando que deixou Cores Tourís. Sobre a celebración planea a sombra da politización que o PP acostuma a facer cos seus actos. Neste caso, para o tradicional reparto de mexillóns e polbo (onte xuntáronse máis de 800 persoas), representantes doutras formacións políticas nunca teñen convite a pesar de telo denunciado en múltiples ocasións.

Desta volta até a xornalista de La Voz de Arousa pon de relevo o curioso de que toda a plana maior do Partido Popular estivera presente, con Aragunde e Tourís á cabeza.

Un xeito de gastar os cartos en plena crise (que eles tanto se esmeran en recordar cando lles convén) mentres as partidas orzamentarias de servizos sociais se van mermando co paso dos exercicios.

Publicará o Concello o balance económico da Festa popular que ofreceu onte? Así saberíamos cantos proxectos poderíamos ter sacado adiante como Concello de aforrar en celebracións partidistas pagadas por tod@s, como a de onte.

Información e imaxe extraídas de La Voz de Arousa

O BNG de Cambados pide as contas da viaxe a Arxentina

O Grupo Municipal do BNG de Cambados pediu hoxe publicamente ao goberno local que aclare quen pagou os costes da viaxe que Luís Aragunde e Cores Tourís fixeron a Arxentina este mes. Publica hoxe Galicia Confidencial que o presidente da Xunta asegurou non ter constancia de que o delegado da Xunta en Pontevedra, Tourís, formara parte da comitiva, e máis tarde o propio Goberno Galego sinalou que o ex alcalde viaxara durante uns días de vacacións que se tomou. O BNG local quere saber agora se a viaxe a Arxentina foi pagada polo Concello.

Víctor Caamaño sinala que o Partido Popular xa iniciou a campaña das Eleccións Municipais de 2011, acudindo ao país sudamericano a “mercar vontades” seguindo o estilo de Rafael Louzán desde a Deputación.