Archive for

20 rapaces poderían quedar sen praza no CEIP San Tomé por falta de espazo: o BNG ve na construción do pavillón no 98 unha causa dos problemas

Segundo sinalan hoxe na prensa comarcal, uns vinte alumnos do Colexio Público San Tomé poderían quedar sen praza por falta de espazo físico. A solución inmediata ao problema pasaría pola creación dunha nova aula no centro, algo ao que tradicionalmente a Consellaría é reacia por supoñer un esforzo económico adicional.

Pola súa banda, o voceiro do BNG de Cambados, Víctor Caamaño, remite unha nota de prensa na que lembran que a construción do pavillón deportivo nos terreos do CEIP no ano 1998 (coa oposición de pais e profesorado, ademais da dos nacionalistas) deixou ao colexio sen uns terreos que servirían para solucionar os problemas que agora se plantexan.

Ademais, o BNG pensa que a solución de crear unha aula é un remendo que vai restar espazo de recreo aos nenos de Educación Infantil, por iso reclaman ao Concello que inicie contactos para adquirir terreos colindantes ao colexio que posibiliten a ampliación do patio. Ademais creen que Concello e Consellaría deberían sentarse a planificar as necesidades futuras nos centros escolares do municipio.

4 anos baixo a óptica laranxa

Cambados.tk cumpre xa catro anos oficiais. E se digo oficiais é porque a vida virtual da web é algo maior.

Naceu como un proxecto de fin de trimestre para unha asignatura de informática de 4º de ESO, se non me equivoco. E grazas ao profesor, Marcos (ao que lle envío un saúdo desde aquí, aínda a riesgo de que non lle chegue) aquela páxina cutreira e moi básica colgouse en Internet baixo o dominio .tk, o que logo lle deu á web o nome e a identidade (non é difícil escoitar a alguén referirse á cambados.tk simplemente como “tecá”).

Dende aquela a web foi evolucionando, sobre todo polo feito de que empezou a ser coñecida (contribución moi importante foi o nacemento do espazo de  Unha Grande Chea a finais de 2005) e tamén porque atraeu un bo número de colaboradores: nestes anos podo contar unhas vinte ou trinta persoas que tiveron algunha aportación a CTK.

Incluso conseguiuse que os contidos da páxina chegaran a outro tipo de público coa edición autofinanciada de 2 boletíns, publicados en papel laranxa, por medio da venda daquelas camisolas e a colaboración de negocios locais que contribuiron a través da publicidade. Chamámolo Mocidade en Marcha.

E cambados.tk influiu tamén na política. A política local foi o eixo arredor do cal xirou o que se chamou a “marea laranxa” . O compromiso polo cambio en Cambados. É certo que este obxectivo aínda non o vimos cumprido, pero é certo tamén que este humilde espazo na rede si abriu as portas ao coñecemento e ao debate, xa non só sobre política senón que promocionou a discusión a todos os niveis por medio dun libro de visitas aberto que moitas veces non foi aproveitado de xeito positivo.

Cambados.tk mudou até 5 veces de deseño, até chegar ao que é hoxe: Convertida nun blog persoal en blogaliza, aínda que como sempre aberta a calquera tipo de colaboración, mais CTK xa non é o que era. Eu, persoalmente, boto en falta ese contraste de ideas e de artigos que tiveramos a ocasión de vivir durante algún momento puntual da curta historia desta páxina. Por iso me me gustaría que un novo Mocidade en Marcha vira a luz este verán, porque penso que hai moito do que falar e son tamén moitos os que deben falalo.

Desde aquí so me queda agradecer a todo o mundo que colaborou e colabora e especialmente a aqueles que protagonizaron e aos que lles pertencen estes catro anos: a todos os que entrades e ledes. Grazas.