Archive for

A política humana. Unha mañá de Ana Miranda en Bruxelas

Posted by Óscar ⋅ 21/05/2009

Descubro por medio do Facebook de Ana Miranda, a candidata do BNG ás eleccións europeas, un interesante vídeo aficionado que un amigo dela gravou en Bruxelas como mostra do comezo dun día normal da vida de Ana e de Xulia, a súa filla.

Aínda que moito máis longo e tecnicamente de peor calidade, dime moitísimo máis tanto da muller como do proxecto que quere representar en Europa que o vídeo oficial que o propio partido colgou en internet.

Ramón Cabanillas desde aquí (III)

Posted by Óscar ⋅ 21/05/2009

anocabanillas1

O pasado sábado 16 de Maio tivo lugar a entrega do VI Premio Ramón Cabanillas, que recaeu no académico trianero Francisco Fernández Rei. O acto rematou coa interpretación emotiva do Himno de Acción Gallega que o propio Poeta da Raza publicou en Vento Mareiro e que logo incluiu tamén en Da Terra Asoballada. Con este poema Cabanillas convírtese no poeta oficial do agrarismo de Basilio Álvarez.

A interpretación foi musicada a cargo de Xaquín Xesteira (oboe) e Xoán Silva e Blas (guitaras e voces). O auditorio rematou por cantar “a capella” os últimos versos.

ACCIÓN GALLEGA

Hino

¡Irmáns! ¡Irmáns gallegos!

¡Dende Ortegal ó Miño!

a folla do fouciño

fagamos rebrilar!

Que vexa a Vila podre,

coveira da canalla,

á Aldea que traballa

disposta pra loitar.

Antes de ser escravos,

¡irmáns, irmáns gallegos!

que corra a sangre a regos

dende a montana ó mar.

¡Ergámonos sin medo!

¡Que o lume da toxeira

envolva na fogueira

o pazo siñorial!

Xa o fato de caciques,

ladróns e herexes, fuxe

ó redentor empuxe

da alma rexional.

Antes de ser escravos,

¡irmáns, irmáns gallegos!

que corra a sangre a regos

dende a montana ó val!

^{Poema publicado en Vento Mareiro e logo en Da terra asoballada. Recollido de Ramón Cabanillas Enríquez. Biografía en imaxes de Maribel Iglesias Baldonedo.}