Archive for

Pódese ver en youtube o documental censurado pola nova dirección da TVG

ProduccionesFrijito, así se chama o usuario que filtrou hoxe á rede o documental de A Caixa Negra que non se emitiu o pasado martes na Televisión de Galicia. O episodio subiuse en 6 partes duns dez minutos de duración cada unha, a que aquí se amosa corresponde cos dez primeiros minutos da explicación do que ocorreu  hai nove anos en Galiza co chamado Mal das vacas tolas. Podes ver todos premendo aquí, aínda que se prevé que tarde ou cedo os vídeos sexan retirados da rede.

Galego: lingua europea, lingua universal.

Nos debates galegos (prensa, radio, televisión) sobre as eleccións europeas temos visto como a candidata do Partido Popular de Galicia, Carmen Fraga, ou non sabe ou non quere falar o noso idioma.

Facíame graza escoitar a Ana Miranda (BNG) falar de multilingüismo e prometendo que ela ía ser garantía de defensa dos intereses de Galiza EN galego no Parlamento Europeo; e ao seu carón un persoa que di que tamén vai defender este país na Eurocámara nin sequera ten a mínima decencia para expresarse na lingua que nos une aos galegos, non xa no Parlamento Europeo, senón nos canles públicos de comunicación de Galiza.

Somos moitos os cidadáns que gustariamos dun representante en Bruxelas que, como xa fixo no seu momento Camilo Nogueira (1999-2004), defendese a pesca, a agricultura, a gandería, o transporte, a cultura, a loita contra a crise e os intereses económicos do noso país e na nosa lingua, aínda que como no pasado teña que facerse valer a proximidade lingüística co portugués para poder pór en práctica con naturalidade o feito de que a nosa é unha lingua universal e non un idioma da aldea, como ao mellor pode pensar xente como Carmen Fraga, á que polo visto lle importa moi pouco coñecer e practicar a realidade da terra que pretende defender desde o seu euroescano.

Grazas a eles, aos supostos deputados galegos de PP e PSOE, levamos cinco anos ausentes do debate comunitario. O feito de que non se expresen nin reivindiquen alí (nin aquí, por que non dicilo) no idioma deste país é só un indicador máis da súa submisión aos intereses dos seus partidos e non da súa xente.

É hora de que o galego, como idioma, pero tamén como fondo do discurso político,  volva a resoar nas sedes do Parlamento Europeo. Sen dúbida, será o mellor para Galiza.

Os cambios na CRTVG seguen, desaparece o programa de música galega

“Chega o momento da despedida. Hai máis de tres anos principiabamos esta aventura. E agora chega o momento de dicir adeus, e dicir grazas (…) Grazas a tantos artistas galegos, a tanto talento. Somos un pobo de artistas. Cando chegamos houbo certas dúbidas. Había quen dicía que non había música galega de abondo para encher unha hora de programación diaria. E a verdade, e dígoo sen ningún pudor, é que botamos por fóra. A aventura continúa. Agora chega o tempo de que veñan outros compañeiros para manter aceso este facho sonoro. Ata logho amigos, tres, dous, un, partíu”

Así despediu Xurxo Souto o pasado luns 1 de Xuño o programa Aberto por Reformas da Radio Galega, día no cal os novos directivos da CRTVG decidiron non só xa prescindir do mítico presentador, senón botar abaixo a filosofía do único programa de radio que trataba a música deste país. Aínda que o espazo segue a existir co mesmo nome, o día seguinte á marcha de Souto o novo condutor, Xusto López Carril, comezou xustificando cambios que virían; e tal hipótese confirmouse co primeiro artista que soou: Bruce Springsteen.

Isto, despois do que sucedeu co programa da Televisión de Galicia A Caixa Negra abre un escuro horizonte sobre o ente público galego e sobre todo fan que lembremos os episodios máis sangrantes da manipulación informativa que padecimos durante os gobernos de Manuel Fraga na Xunta. Diferentes artistas galegos amosaron a súa preocupación por esta desaparición dun programa que consideran fundamental para o avance da música galega.

Cal será o próximo espazo da CRTVG en caer? O Hai Debate, quizais?

No vídeo, entrevista de A Nosa Terra a Som do Galpóm, grupo que vén de sacar o seu primeiro disco e autores do último tema que soou no Aberto por reformas de Xurxo Souto.