Archive for

O Ano Cabanillas no diario El País

A edición galega do diario El País dedicoulle hoxe unha folla do seu apartado de “Galicia” ao Ano Cabanillas 2009. A xornalista arousá Deborah Castro fai un percorrido polos actos que durante todo este ano están tendo lugar na memoria do escritor cambadés no seu 50 cabodano.

Sorprendentemente, ademais de contar a versión da parte oficial do Ano Cabanillas, do alcalde Luís Aragunde, o artigo de El País recolle tamén a opinión de Óscar Pardo Planas, creador de Cambados.tk, no que recoñece o labor do Concello de Cambados pero critica que non se formara unha verdadeira comisión coas asociacións e que iso derivara na práctica en varios Anos Cabanillas paralelos.

Ademais Deborah Castro repasa a exposición Os artistas de Cabanillas, que se pode visitar na actualidade no Pazo de Torrado, así como a publicación da biografía do poeta por parte de Luís Rei. Lembra tamén neste artigo que o 12 de Novembro terá lugar na nosa vila unha sesión plenaria extraordinaria da Real Academia Galega que coronará este Ano Cabanillas 2009.