Archive for

Mañá sábado Manifestación contra as touradas en Pontevedra

Un lector achéganos a información das actividades da Coordenadora Antitouradas de Pontevedra. O prato forte é a manifestación que vai ter lugar mañá Sábado do Albariño en Pontevedra baixo o lema “a tortura non é arte nen cultura”. Será na Peregrina arredor das 20 horas e como ben din quen nos achega a nova, dá tempo logo a disfrutar das Festas do Albariño.

Este tema está estes días máis de moda que nunca pola prohibición das touradas en Catalunya logo de que o Parlament votara hai un par de días nestes sentido. A pregunta é…para cando en Galiza?

Adela Leiro publica unha web en internet co seu traballo

A profesora e escritora Adela Leiro vén de publicar en internet unha páxina web na que pon a disposición de todo aquel que queira o “traballo de case corenta anos”. Fotografías (as cales son unha auténtica marabilla e xa deron pé a varias publicacións), material didáctico, rutas para coñecer o país…en definitiva un lugar extremadamente interesante para coñecer máis -e mellor- a nosa Galiza.

Noraboa a Adela por este novo paso e sobre todo moitas grazas por compartir aínda máis todo o que coñeces.

AdelaLeiro.com pasa a formar parte das ligazóns de Cambados(tk).

O BNG tamén quere saber quen son e por que comen gratis no Xantar do Albariño

Hoxe chéganos unha nota do portavoz do BNG de Cambados, Víctor Caamaño, na cal se dirixe ao alcalde de Cambados para preguntarlle quen son e o motivo polo cal os máis de 600 convidados (se a cousa segue como anos anteriores) van xantar gratis o próximo Domingo de Albariño na nosa vila con motivo do feche das Festas.

Hai uns días Cambados(tk) lanzaba esta proposta, que é a explicación mínima que pode dar o Concello ao respecto. Os cidadáns, e máis os que o están a pasar mal por mor da crise, tñen dereito a saber quen vai comer á súa conta e por que razón.

Alegra ver tamén como outra xente vai levantando a voz contra o Xantar. Estes días facíao a profesora Maribel Iglesias desde o seu blog (O Umia) cun interesante artigo que non deberías deixar de ler.

Unha Grande Chea fai unha proposta para a inauguración do Albariño 2010

A proposta de UGCH consiste en que tanto a súa peña como Chejar e Encher teñan un papel especial na inauguración desta edición da Festa. E é que Unha Grande Chea atópase no seu 25 aniversario e Chejar e Encher, con que están irmandados desde unha cea no 2008, cumpre 20 anos de idade.

O presidente de UGCH, Xaquín CHarlín (Chon), solicítalle ao alcalde a través da páxina web oficial que ambas deberían estar convidadas oficialmente á inauguración e ao corte de cintas.

Toda iniciativa que contribúa, coma esta, a facer do Albariño un evento máis cercano ao cidadán e menos ao Partido Popular, merece o apoio de todos e todas.

Le aquí o email que UGCH enviou a Luís Aragunde.

O alcalde responde o email de Cambados.tk

Coincidindo co lanzamento do vídeo crítico co Xantar do Albariño na Rede, que podes ver na anotación anterior, o alcalde Luís Aragunde remitía a través do Gabinete de Prensa do Concello a resposta ao email que se enviaba unha semana atrás e que lle solicitaba que os cartos que se aforrasen dun hipotético reaxuste do Xantar do Albariño se destinasen a asinar un convenio estábel con Esperanza Salnés.

No seu cordial email (que podes ler íntegro premendo aquí) Aragunde non é capaz de argumentar a favor de que se lle pague a comida a máis de 600 persoas, a maioría ligadas ao Partido Popular, senón que se limita a soster que “este evento coñecido en todo o país e fóra das nosas fronteiras naceu, precisamente, nun xantar onde diferentes adegueiros e personalidades daquel momento se xuntaron para ensalzar e competir polos mellores caldos da bisbarra”.

Algo que evidentemente é certo, como tamén poñemos de manifesto no vídeo crítico que lanzamos, pero que dista moito da realidade en que se converteu o Xantar do Albariño hoxe en día.

Naquel email que lle enviabamos hai unha semana tamén se solicitaba unha entrevista para este medio, tal e como suxeriron os lectores a través do grupo de Facebook. Nada comentou o alcalde ao respecto, a entrevista terá que agardar.

Desde aquí agradecerlle a Luís Aragunde o seu tempo, xa que a pesar de non ter recibido a resposta que se desexaba, tamén é certo que agora sabemos que polo menos os veciños poden contactar con el a través da páxina web oficial de Cambados.

Xantar Oficial: Quen son e por que comen gratis?

O alcalde de Cambados, Luís Aragunde, xa declarou nos últimos días que o Xantar do Albariño vai celebrarse e que seguirá habendo convites como en anos anteriores pese ás chamadas ao aforro do BNG e a proposta de Cambados.tk de empregar os cartos con fins sociais.

O que non estaría de máis e que os grupos da oposición, ademais de pedir as contas do Xantar cando pasen as festas, soliciten ao goberno local unha relación de todas as persoas que asistiron ao evento e cal foi o motivo do convite das persoas que comeron gratis. É o mínimo que pode explicar o Concello xa postos a malgastar esa partida, que podería ser utilizada en asuntos moito máis importantes e xustos,  nunha comida.

LUÍS ARAGUNDE NA RADIO, PREGUNTADO POLO XANTAR

O pasado mércores Aragunde comparecía no programa La Opinión de Radio Arousa (Cadea Ser) para que os cidadáns lle fixeran preguntas. O espazo de media hora tivo éxito e as chamadas foron sucedéndose. Dúas delas foron referidas ao Xantar do Albariño. Non se puido gravar a primeira pero si a outra para ser posta a disposición de quen queira escoitar tanto ao oínte como a resposta do rexedor.

No vídeo de arriba podes escoitar un resumo (preme neste enlace se queres acceder ás declaracións íntegras).

E EU, QUE FAGO?

Se estás en desacordo co Xantar do Albariño podes  enviarlle a Aragunde unha pequena queixa a través da sección Fala co Alcalde de www.cambados.es, difunde a través de email, twitter ou Facebook calquera dos vídeos que se ofrecen nesta anotación, ou acércate o domingo do Albariño a facerlles chegar a túa queixa aos máis de seiscentos persoeiros que comerán á túa conta.

Un euro para que o Refuxio de Animais merque o que outros lle roubaron

Internet vale para moito máis que ler xornais ou falar c@s amig@s. Ás veces da rede xorden iniciativas interesantes e solidarias.

Esta mañá, desde o Facebook da Protectora de Animais de Cambados se lamentaban dun roubo no cal perderan unha cara máquina de cortarlle o pelo aos animais que alí coidan, cun custo duns 400 euros. Minutos despois unha usuaria da rede social propoñía que cada un d@s amig@s do Refuxio de Animais ingresaran na conta bancaria da entidade un euro.

Se queres ser partícipe desta bonita iniciativa, fai a túa achega na conta:

2100-5036-49-0200074762 de La Caixa

A imaxe foi extraída do Facebook de Refuxio de Animais Cambados

Treixadura hoxe en concerto na Praza do Concello

Treixadura dará un concerto hoxe Sábado 17 de Xullo con motivo do seu 20 aniversario e enmarcado dentro das celebracións da Festa da Vieira 2010. Para quen aínda non o saiba Treixadura é un magnífico grupo de música tradicional do país e consta de dúas seccións: Treixadura Gaiteiros (onde participa o mestre da gaita cambadés Xaquín Xesteira) e Orfeón Treixadura, a parte vocal do grupo.

Desde logo un grande acerto para as celebracións desta fin de semana. Será entorno a medianoite na Praza do Concello.

Política local na prensa comarcal II(Xuño-Xullo '10)

Durante un mes recolléronse as novas políticas publicadas nas edición dixitais de Diario de Arousa e La Voz de Arousa (o Faro non puido ser incuído por publicar na rede só unha pequena parte dos seus contidos comarcais) e amósase a presenza de cada organización política en cada xornal. Aí van os datos correpondentes ao período 14/6 ao 13/7 deste mesmo ano:

(na gráfica compáranse as novas xeradas por cada partido entre os dous xornais analizados -tanto en números absolutos no eixo como en porcentaxe enriba das barras)

Aragunde aprende rápido de Tourís: "As críticas xa deberían formar parte do programa do Albariño"

O programa do Albariño, que adoita saír en datas próximas á festa, acostuma recoller unha programación duns seis meses; tres adiante e tres atrás. Pero o alcalde vai máis alá, aínda que “ironicamente”, e contesta ás propostas de aforro entorno ao Xantar do Albariño coa seguinte frase (máis propia de Tourís que del mesmo, pero parece que Aragunde aprende rápido do ex alcalde):

“as críticas do Bloque e máis do PSOE nestas datas tamén forman parte da Festa do Albariño e talvez deberían de incluírse no programa” (La Voz de Arousa 13/7/10)

Segundo este diario rexeitou tamén o rexedor a proposta lanzada desde este medio de crear un convenio estábel con Esperanza Salnés cos case 30.000 euros que se aforrarían se os comensais do Xantar pagaron o seu prato.

Proposta que foi suscrita pola Asociación Unha Grande Chea e por particulares como a profesora Maribel Iglesias Baldonedo desde o blog O Umia. Maribel tamén empregou a ferramenta Fala co alcalde da páxina web oficial para deixar claro “como veciña de Cambados e contribuínte” que “non están os tempos para “comilonas”, hai quen o precisa máis, o que vaia á comida que a pague do seu peto”. Ti tamén podes enviarlle unha mensaxe a Aragunde desde Cambados.es.

Desde Cambados(tk) estamos á espera da resposta do alcalde tras 48 horas e agardamos que finalmente chegue e que, xa que non parece que o Xantar vaia a organizarse dun xeito limpo e xusto, polo menos poidamos ter a conversa con el que os lectores demandaban hai unhas semanas en Facebook.