//
arquivo

Archive for

A resposta social e política funciona: Portos promete agora sanear antes de poñer as comportas


A resposta que se ten dado desde varios frontes ao proxecto do Concello e da Xunta de instalar as comportas no Saco de Fefiñáns dá agora os seus froitos.

O Partido Popular tivo que convocar no pasado mes unha reunión informativa co sector das mariscadoras pola contestación exemplar que elas deron plantándose ao non ter información relativa ao proxecto. Na reunión, Aragunde, Benito González e varios técnicos da Xunta non puideron paliar a desconfianza que xera todo o problema nas principais afectadas, xa que a gran maioría entende que antes de actuar na zona débese sanear para que non se empeoren as xa malas condicións para o mariscos.

Agora, Portos de Galicia anuncia que antes das comportas haberá saneamento. De algo valeu toda a crítica, a mobilización (reiterar a importancia que tivo o movemento das mariscadoras, clave no asunto) e agora resta por saber se cumprirán coa palabra dada.

Porque despois das múltiples mentiras (como que o proxecto só se levaría a cabo co visto e prace das mariscadoras, ou que existía estudo ambiental) o que está claro é que é difícil fiarse de Concello, Xunta e Confraría nun tema con moi escuros intereses, e que o Partido Popular non está ao lado dos cidadáns, senón que neste caso reacciona polo medo á previsible contestación que pode ter o seu comportamento nas urnas.

Precisamos un Concello que estea ao carón da xente e non a carón dos seus amigos, un Concello que informe e que planee as súas actuacións e non un goberno que faga o que se lle ocurra, sen previsións,  e con ocultación manifesta. En definitiva un Concello que mire por tod@s e non polos seus achegados. De nós depende acadalo.

O BNG preséntase como única alternativa nun orixinal mitin co Auditorio completo


O Bloque Nacionalista Galego de Cambados celebrou onte o seu mitin de presentación do primeiro tramo de candidatura cunha posta en escena pouco habitual. Tanto o candidato á alcaldía, Víctor Caamaño, como os primeiros cinco integrantes da lista e o portavoz nacional do Bloque, Guillerme Vázquez, atendían ao orador sentados no mesmo escenario, e cada un deles participou nas intervencións.

As dos candidatos (a excepción, obviamente,  de Víctor) foron intervencións curtas e directas. A número 6, Josefina Cores, declarou que fronte a situación actual das cousas pódese “ou resignarse ou facer algo”, e por iso se comprometeu co BNG. Ela di que non está disposta a deixarlle aos seus fillos un futuro peor que o que recibiu dos seus pais.

Teresa Prado Cores destacou a necesidade de traballar polas parroquias, xa que a día de hoxe aínda hai lugares sen servizos básicos, algo inaceptable. Ernesto Falcón, número 4, centrouse no urbanisco e declarou que o Bloque non está a favor de destrozar a costa, que quere que Cambados conte cun Plan Xeral de Ordenación Municipal e medre cara o interior. Ademais, sobre as comportas do Saco, asegurou que “non se poden poñer comportas ás cloacas” e que “Cambados non pode ser coñecido polos seus cheiros”.

O número 3, Xaquín Charlín (Chon), comezou asegurando que é do Bloque “e non teño nin rabo nin cornos”, e declarou que o BNG apostará pola cultura e o deporte sen discriminar nunca a ninguén pola súa ideoloxía e rematará co partidismo na Festa do Albariño. A número 2, María Xosé Cacabelos, centrouse nos sectores produtivos, para denunciar que as políticas do PP son apoiar o centro comercial de San Miguel e un polígono deserto, e que o BNG estará ao lado dos traballadores.

Por último, Víctor Caamaño, dixo que en Cambados non houbera un cambio real de alcalde, posto que o alcalde “agora ten cargo de delegado territorial” (por Tourís), e que nos últimos 24 anos co PP en Cambados o Concello non avanzou. Houbo, segundo Caamaño, obras faraónicas e grandes promesas que ao final non se cumpren, por iso é hora dun cambio e o BNG é o único garante de que se cumpra fronte ás políticas de dereitas de PSOE e PP.

O portavoz nacional do BNG arroupou aos candidatos tamén na súa intervención, máis centrada na actualidade política galega e mesmo estatal.

Imaxe de Adela Leiro

Nas redes sociais

Febreiro 2011
L M M X V S D
« Xan   Mar »
 123456
78910111213
14151617181920
21222324252627
28  

Arquivo

wordpress counter

Escribe o teu enderezo de correo electrónico para seguir este blogue e recibir notificación dos novos artigos.

Segue CTK en Facebook