Entrevista aos candidatos. Mocidade

Pregunta 2. Que medidas propón para a mocidade de Cambados?

Domingo Tabuyo, candidato do PSdeG-PSOE.  A mocidade  é o noso presente e ten que ser a garantía do mellor futuro para o pobo, e para iso, debe ter espazos propios e proposta propias: queremos crear o Multiespazo Xove na Xuventude, con locais de ensaio para os grupos musicais, e espazos para a creatividade e as novas tecnologías, e que sexa xestionado por un equipo elegido por eles mesmos. Queremos facer de Cambados un Concello wifi, aberto accesible e para todos. E tamén apostamos pola creación  dun Consello local da Xuventude, e unha oficina de Mediación Xuvenil. Máis información na páxina web do PSOE de Cambados.

Víctor Caamaño, candidato do BNG. A mocidade foi tradicionalmente o grupo social esquecido polos diferentes goberno do PP no concello (so se acordaron dela para utilizala politicamente). Ademais é un dos colectivos máis afectados pola crise económica o que se traduce nunha alta taxa de desemprego.
O BNG considera á mocidade como o máis importante capital humano e por iso incluímos propostas para ela en todos os apartados do noso programa. Entre as nosas propostas están o garantir o libre acceso, en igualdade de oportunidades, a todo tipo de convocatorias e servizos do concello, ofertar espazos e axudas para o desenvolvemento de distintas actividades (ensaios, obradoiros de arte, reunións, audicións musicais…), deseñar unha oferta cultural e deportiva ampla e diversificada para a mocidade, promover as súas manifestacións artísticas, deseñar sistemas de participación na política municipal (web social aberta), facilitar o acceso as infraestructuras deportivas, incrementar o orzamento destinado a bolsas de estudo, crear vivenda de protección e facilitar o acceso en boas condicións a mozos e mozas, promoción do asociacionismo xuvenil e autoorganización, realización de campañas de formación, información e prevención de riscos (sexualidade, drogas…)… Máis información no blog de Víctor Caamaño.

Luis Aragunde, candidato do PP. Sen resposta

(O candidato do Partido Popular ignorou a proposta de Cambados(tk) a pesar de ter sido notificado en igualdade de condicións que os demais candidatos e polo tanto descoñecemos a súa resposta)

A ENTREVISTA CONTINÚA MAÑÁ CON NOVAS RESPOSTAS
Podes atopar aquí todas as preguntas publicadas até o momento