O voceiro do BNG no Concello, Víctor Caamaño, respostou onte contundentemente ás declaracións do alcalde, nas que afirmaba que o Bloque estaba en contra da festa. Caamaño teno claro: “o BNG fai estas críticas porque quere que a festa sexa o mellor posible” e que “iso é compatible con gozar da festa e participar do seu ambiente. Faltaría máis”. O voceiro nacionalista di que Aragunde emprega a mesma táctica que Tourís tentando transladar á cidadanía que a crítica a un aspecto organizativo da festa significa estar en contra da Festa.
Caamaño está dacordo con que o Albariño atrae a atención sobre a nosa vila, e iso tradúcese en visitantes. Pero non o Xantar, que “ao único que atrae é a diversos come de baldes do PP”. Subliñou do mesmo xeito que é escandaloso que veñan 72 cargos políticos da Xunta cos seus respectivos acompañantes. “Aragunde pérdese a cotío falando de austeridade” segundo Caamaño, e debería lembrar que os cartos ingresados pola carpa (que o PP di que serven para sufragar o Xantar) non saen do peto do alcalde, e poderían ser empregados para outras finalidade como “os 4 millóns de euros de débeda do Concello”.
Respostou tamén ás críticas que fixo Aragunde á suposta falta de axudas durante o bipartito. Caamaño lembrou que as hemerotecas gardan as declaracións do alcalde e do anterior rexedor, Cores Tourís, agradecendo ao BNG a colaboración no evento desde a Xunta de Galicia (o Bloque gobernaba as áreas de Turismo e Medio Rural entón). Do mesmo xeito, respostou a Aragunde que no ano 1985 cando se convidou a ler o prefón a Xosé Manuel Beiras (gobernaba o Concello daquela o nacionalismo), Beiras non era nin sequera deputado no Parlamento senón un prestixioso catedrático que escribira sobre os sectores produtivos do noso país.
Para rematar, Víctor Caamaño cre que o máis lamentable do asunto é que o Xantar pasara de ser unha reunión de confraternidade para convertirse nunha “romería de exaltación do PP”. Cos cartos de todos, habería que engadir.
Cambados(tk) 
Conversa
Aínda non hai comentarios.