“Entreparadas”, un proxecto en Ourense con compoñente cambadesa

Entreparadas é unha iniciativa que ten lugar nos autobuses urbanos de Ourense, nos que 16 persoas (con diferentes discapacidades físicas, intelectuais, vítimas de accidentes de tráfico…) representan pequenas pezas de teatro nas que se rinde homenaxe á xeración Nós, mentres os usuarios dos buses suben e baixan dos mesmos. O obxectivo é fomentar o uso do transporte público e a integración das persoas que pertencen a grupos con risco de exclusión social.

A asociación de Prevención de Accidentes de Tráfico (PAT) é a responsable de organizar esta idea. Precisamente un dos impulsores é o sarxento xefe da Policía Local de Cambados, Maximino Cid Ferro (agora en comisión de servizos en Ourense) e participa tamén a directora da compañía de teatro Caracol, Olga González Vilas. Segundo a páxina Cambadosweb.net haberá un documental dirixido por Jorge Coira no que se plasme o proxecto.