Duarte Correa, veciño de Oubiña, foi até 2009 responsábel comarcal do Bloque Nacionalista Galego no Salnés, ademais de participar activamente no sindicalismo a través da CIG-Ensino. Agora asume un novo reto integrando a candidatura do BNG ao Congreso dos Deputados, como número 5 en Pontevedra, nas eleccións do vindeiro domingo 20 de Novembro. Preme en “Seguir lendo” para ampliar.
O BNG encara as eleccións marcando diferenzas con PP e PSOE. Brevemente, en que se distingue o BNG do resto do panorama electoral?
O BNG é a única organización política que non recibe ordes de Madrid, poñemos os intereses de Galiza por diante mentres os outros empregan a nosa nación como moeda de cambio dos intereses estatais. Sendo ademais o BNG o único que se opón ás políticas de dereita practicadas por PP e PSOE. Por iso quen querira que Galiza teña forma en Madrid e quen defenda políticas de esquerda ten no BNG a súa opción de voto.
“Os deputad@s de PP e PSOE elexidos en Galiza son a procesión dos caladiños”
Volvendo a vista atras, que iniciativa(s) do BNG en Madrid destacaría? Foi útil o BNG?
A utilidade principal é que Galiza co BNG está presente na política do estado, e de non estar nós Galiza tampouco estaría, pois os deputad@s de PP e PSOE elexidos en Galiza son a procesión dos caladiños.
A nosa presenza en Madrid obrigou ao gobernó estatal e duplicar os investimentos en infraestruturas no noso país que pasaron dun 4% escaso a máis do 8% neste período; e a nosa denuncia e oposición fixo que medidas como a reforma laboral ou a reforma das pensións foran menos lesivas que os proxectos iniciais presentados polo goberno. Trasladar as reivindicacións da industria naval ou dos sectores lácteo e pesqueiro son outros exemplos da nosa utilidade.
No contexto actual parece que todo o que está por vir son recortes de dereitos e emprobrecemento da calidade de vida. Hai alternativa fronte á crise?
Si, hai alternativa e esta pasa por un novo modelo económico que contemple un control público de sectores estratéxicos como enerxía ou comunicacións, uns orzamentos elaborados segundo criterios sociais, unha banca pública que favoreza o creto, a creación de riqueza en base á creación de emprego digno e non en base á especulación, e uns servizos sociais acordes co século XXI no que estamos. Hai que acometer unha reforma fiscal que obrigue a pagar máis ás rendas máis altas fronte á actual política de subir os impostos indirectos que gravan por igual a un mariñeiro que ao señor Botín.
Por poñer só dous exemplos, cos 2000 millóns de euros enterrados na guerra de Afganistan poderían construirse sete grandes hospitais públicos en Galiza, e rebaixando o fraude fiscal das grandes corporacións a niveis europeos obteríamos anualmente 25.000 millóns de euros que son 10.000 millóns máis do que “aforrou” o estado en 2010 conxelando as pensións, rebaixando os salarios de traballadores públicos e eliminando axudas á dependencia.
É todo cuestión de prioridades e de que os gobernantes elixidos polo pobo non sexan marionetas dos mercados e da gran banca.
“Reforma fiscal: que paguen máis as rendas máis altas”
Que opina o Bloque sobre o Senado? Continuidade, reforma, eliminación…?
O Senado na súa configuración actual non vale para nada, pero ese non é o problema primordial; hai que proceder a modificar a lei electoral facéndoa verdadeiramente proporcional, pasando a ser Galiza a circunscrición electoral, eliminado os mailings, estabelecendo debates obrigatorios nos que estea garantida a presenza de todas as forzas, etc…. E o Senado debe transformarse nunha cámara verdadeiramente representativa dun estado plurinacional ou debe desaparecer.
Alén das eleccións xerais, barállase un adianto electoral en Galiza. Está o BNG preparado para dar a batalla e recuperar a Xunta?
Se o BNG é a única garantía de presenza de Galiza nas Cortes con máis razón é a única forza con capacidade para enfrontarse a Feijóo en Galiza e para encabezar a transformación política, económica e social que precisa a nosa nación. O BNG está preparado para asumir ese reto.
Cambados(tk) tentou poñerse en contacto a través da rede (de igual xeito que con Duarte Correa) cos candidatos do PP, Telmo Martín, e PSOE, Manuel Vázquez, mais non se obtivo resposta.
Cambados(tk) 
Conversa
Aínda non hai comentarios.