65 traballadoras de Guau, á rúa

Esa é a mala nova que os xornais comarcais reflicten hoxe nas súas páxinas (recomendado o repaso á historia  asinado por Maruxa Alfonso na Voz). Sesenta e cinco traballadoras da conserveira Guau (cuxo nome é en realidade Alimentos Arousa agora) quedan sen empregos desde que o pasado 11 de Novembro a fábrica aparecera pechada. Din que de momento non se mobilizan porque non hai nin dirección nin empresarios contra os que manifestarse, pero desde a CIG si anuncian que presentarán demandas por despido improcedente.

A conserveira vai en camiño de sumarse á lista de empresas do sector que rematan por pechar. Lembrar que as traballadoras de Alfageme están nestes momentos loitando polo mantemento dos seus postos de traballo. Guau, antes localizada en San Tomé, xerara polémica durante os últimos anos porque fora adquirida por un grupo de coñecidos empresarios da vila con negocios urbanísticos, interesados en construir vivendas onde se erixía a antiga factoría. De feito, agora a empresa está no Polígono (grazas a unha subvención da Xunta de 3 millóns) e hai un ano o Concello aprobou unha modificación das Normas Subsidiarias que abre a porta á recualificación deses terreos.