Aragunde asegura que a gardería non se encarecerá

O alcalde de Cambados zanxou así o debate que se vén producindo hai días sobre a suba de prezos tamén nas garderías. As que dependen directamente da Xunta (por exemplo as antigas Galescolas, agora Galiñas Azuis)  si verán aumentadas as súas tarifas este ano, en concreto no mes de Setembro. Respecto ás municipais, son os gobernos locais quen deciden sobre o asunto.

Neste sentido, Luís Aragunde manifestou a La Voz de Arousa que a de Cambados non aumentará prezos porque “é un momento difícil, e non podemos repercutir todo nas familias”. Esta declaración, que a priori debería tomarse ao pé da letra, ten unha fiabilidade relativa, logo de que o Concello subira varios impostos municipais a finais de ano tan só 15 días despois de que Aragunde dixera na prensa que o Concello non subiría as taxas, precisamente polo motivo da crise. Só queda agardar que desta vez si cumpra a súa palabra. Imaxe de Cambado.es