A loita do Refuxio polas instalacións comarcais entra na recta final

O Refuxio de Animais de Cambados entra na fase final de recollida de sinaturas para defender a concesión das instalacións comarcais que finalmente serán outorgadas pola Deputación de Pontevedra.

Aínda que o Refuxio fora a única entidade solicitante cando a Mancomunidade abriu o concurso, foi logo a entidade provincial a que se fixo cargo do mesmo e agora a asociación cambadesa compite cunha empresa privada (Tragsa) pola concesión. Na rede a campaña que están a facer os de Cambados é intensa, insistindo en que o seu plan é viábel e merecen a concesión pola traxectoria da canceira en Cambados ademais de polo feito de teren sido os únicos presentados ao concurso orixinal. Eles acusan ademais ás empresas privadas de non ter en conta o benestar dos animais e incluso afirmaron que de concederse a canceira a Tragsa, esta podería convertirse nun “centro de exterminio”.