Orzamentos 2012, consúmase a suba de impostos en Cambados

No pleno deste xoves serán tratados unha boa cantidade de puntos da orde do día. O máis relevante sexa, quizais, o debate e aprobación ou non dos Orzamentos para este ano. Orzamentos sobre os que xa se informara en CTK hai meses e que popoñen unha suba xeralizada de impostos, moitas das veces por riba do IPC (o que se considera. a “suba do prezo da vida”). Non hai que viaxar atrás moito no tempo para lembrar como en cuestión de tres meses o alcalde, Luís Aragunde, pasou de amosar a súa oposición á suba do IBI e en xeral das taxas municipais, a anunciar que o seu propio Goberno as incrementaría. Con toda probabilidade, os votos do PP (que xa aprobaran en Outubro a suba das taxas) consolidarán esa suba coa súa inclusión nos presupostos.

O Imposto sobre Bens Inmobles, que o Goberno de Mariano Rajoy tamén incrementou, vai posibilitar que  o Concello ingrese case 300.000 euros máis que no pasado exercicio (e aos cambadeses custaralles 30 euros adicionais). Entre as caídas máis pronunciadas nos ingresos volve a figurar a concesión de licenzas urbanísticas (o Concello deixa de ingresar 20.000 euros con respecto o ano pasado). No apartado de gastos destaca, como de costume, o de persoal que é de 3.8 millóns de euros (un 46% do total dos gastos).

PREGUNTAS NO PLENO

No pleno, ademais da materia orzamentaria, tratarase o tema da subestación eléctrica en Vilariño. A cuestión sería traída ante o goberno polos concelleiros de PSdeG e BNG. Os nacionalistas ademais volveron presentar unha moción para pedir que se lles resposte a máis de vinte preguntas das que non obtiveron resposta desde que se formularon en Febreiro.