Tourís recorre ao ataque persoal para defenderse no caso do desmonte do Monte de Maza

Montse Prado e a súa familia foron onte o obxectivo das declaracións de Cores Tourís, ex alcalde e delegado da Xunta en Pontevedra. O político cambadés volveu recurrir máis outra vez aos ataques persoais para defenderse dunha acusación. O caso do Monte de Maza ten moito que ver co delegado da Xunta, xa que tanto a súa muller como o sobriño desta (e concelleiro do PP) están envoltos nunha serie de presuntas irregularidades na petición de permisos para desmontar o monte e convertilo en viñedo.

Como o BNG foi o grupo que destapou e que está a denunciar o caso en múltiples instancias autonómicas, Tourís encargouse onte de lanzar un recado á formación nacionalista: “Sacamos máis permisos dos que nos corresponde” e recordou que Montse se opuxera ao Polígono e que segundo el “pediu para plantar viño no monte comunal”. As acusacións foron máis alá, e Tourís mesturou á familia de Montse Prado acusando a unha irmá de ter construido a casa “nunha carballeira” e afirmando que o Concello paralizou unhas obras na casa da nai.

Iso si, as obras do Pinal de Maza continúan; 80.000 metros cadrados de monte están pelados e listos para comezar a producir.  Hai días o BNG recibiu unha sorprendente contestación de Medio Rural asegurando que o departamento “non tiña constancia” da transformación ocorrida no Pinar. Aínda así a Xunta asegurou que estas obras serían sancionadas se ocorreron. O Bloque xa remitiu fotografías do antes e o despois.