O PSOE sen representación comarcal nos postos de saída. No BNG, Montse Prado número tres por Pontevedra

PSOE e BNG van despexando as incógnitas sobre as súas listaxes electorais. No ámbito socialista, tras uns últimos días convulsos as novas revelan que por primeira vez en moitos anos a comarca arousá quedará sen representación no grupo parlamentar do PSOE. Trala renuncia de Modesto Pose a integrar a lista (Pose estaba abertamente enfrontado a Pachi Vázquez), o vilagarcían Julio Torrado foi o elixido das bases para substituílo. Porén, as listaxes sufriron cambios de orde ao chegar a Compostela e Torrado foi tirado fóra dos postos de saída. Unha decisión que, ademais de causar malestar nas agrupacións da bisbarra, deixará fóra do Parlamento a unha comarca que historicamente estivo representada.

Modesto Pose e Julio Torrado | Iñaki Abella, FdV

No lado do Bloque, a Executiva aprobou as listaxes, que agora pasarán ás comarcas para a súa aprobación pola militancia. No caso d’O Salnés, as bases xa se pronunciaran por un grupo de nomes para integrar a candidatura de Pontevedra, e finalmente será Montse Prado a elixida. Ela concorrerá no número tres da lista nacionalista, por detrás de Carlos Aymerich e Carme Adán. Montse Prado é Secretaria de Organización do Bloque e veciña de Oubiña, na anterior lexislatura fora delegada da Consellaría de Industria. Sitúase así Prado en postos de saída, xa que o BNG ten agora catro deputados e a recente enquisade La Voz dalle tres para o 21-O.

No caso da nova coalición Alternativa Galega de Esquerda integrada por Esquerda Unida e Anova, será hoxe cando os militantes de EU dean o visto e prace ao acordo programático ou non. Na nosa comarca as asembleas teñen lugar en Vilagarcía e O Grove. No caso de Anova, a asemblea comarcal celebrouse no día de onte en Barrantes e sobre a mesa estivo o estado da negociación con EU e as candidaturas para os comicios que veñen. Compromiso por Galicia, pola súa parte, insiste en que acudirá en solitario aos comicios galegos, e este venres n’O Grove hai unha presentación a cargo de Xoán Bascuas, Rafael Cuíña e Alfredo Bea na Casa de Cultura Lueiro Rey, ás 20 horas.