Esperanza

LuscoFusco, “concurso de talentos” das XSG de Cambados en beneficio de Esperanza

As Xuventudes Socialistas de Cambados, as mocidades do PSOE, veñen de presentar unha nova campaña benéfica. Se en Nadal o seu obxectivo foi o de xuntar regalos e alimentos para os máis necesitados (o resultado da campaña foi moi positivo) agora os membros das XSG queren axudar á asociación Esperanza Salnés a través dun concurso de talentos. Seguir lendo →

A Esperanza discontinua

O tema repítese e repítese ao longo dos anos. A asociación Esperanza Salnés, que trata a nenos con discapacidade de toda a comarca, volve a ter a auga ao pescozo. O problema de raíz: esta asociación non pertencente á Xunta  carece de convenios estábeis coas institucións que puideran permitir que se esqueceran por un ano dunhas contas que nunca saen.

O asunto que vimos denunciando moitos todos estes anos é que estes malos momentos financeiros da organización son empregados electoralmente polo Partido Popular. En concreto, ano tras ano (só fai falla remitir a calquera hemeroteca para comprobar como isto é totalmente fiel á realidade) Esperanza anuncia que nun breve espazo de tempo entrará en bancarrota.

Finalmente, no último momento, Rafael Louzán aparece na prensa concendendo unha subvención que lle devolve o pulso á asociación, pero que non lle retira o risco dunha recaída inminente. Ocorre ano tras ano, e nunca até agora houbo un intento serio dos alcaldes (o máis involucrado debería ser Aragunde, quen por certo contou co apoio electoral do xerente da asociación en Maio), da Deputación ou da Xunta por asinar un convenio que poña fin a esta historia.

Repetímolo moitas veces en Cambados(tk), parece que rinde máis unha Esperanza constantemente en perigo que sexa triunfalmente rescatada por Louzán e compañía que unha asociación operativa e sen problemas que poida desenvolver de xeito normal a súa actividade.

Óscar Pardo Planas. Preme aquí para ver todos os seus artigos.

Solución definitiva para Esperanza Salnés

Tamén podes seguilo no seu blog, A ti meu Cambados

Pintura solidaria no Pazo de Torrado

Miguel Ángel Martínez “Chiño” expón no Pazo Torrado unha colección titulada “Paisaxes do noso entorno”. Pero non é unha exposición sen máis, xa que o que se logre recaudar até o día 17 de Abril (data de finalización) irá destinado á asociación Esperanza Salnés de axuda a nen@s discapacitad@s.

Son trinta óleos de estilo costumista onde predominan, como indica o título da exposición, paisaxes, e tamén bodegóns. O seu prezo oscila entre os 500 e os 1000 euros.

Sen dúbida unha iniciativa impecable para axudar a unha asociación que se atopa constantemente ao borde do abismo pola falta de apoio estable das institucións (das mesmas que se deron cita onte para a inauguración, mágoa que non anunciaran por fin o tan necesario convencio estábel con Esperanza…).

O dito, visita recomendada ao Pazo de Torrado.

Información recollida de La Voz de Arousa.

"O noso pobo é fermoso" con xente así

O xoves 21 de outubro ten lugar no IES Francisco Asorey a representación da obra que xurdiu froito da colaboración entre Caracol e Esperanza Salnés. Esta peza fora creada para grabar un vídeo e participar nun concurso da Dirección General de Tráfico o pasado Maio e resultou finalista.

A representación terá lugar a partires das 17.30 horas no Salón de Actos do centro de ensino. Que mellor forma de apoiar á xente que tomou parte nesta boa idea que pasarse a ver unha pequena mostra de que “O noso pobo é fermoso”, título moi certo mentres quede xente como eles.

A imaxe foi tirada do blog de Unha Grande Chea.

O tempo da a razón a Cambados(tk) no caso de Esperanza Salnés e Deputación

A comezos de Xullo criticábase máis unha vez desde esta web a política da Deputación, neste caso en relación coa asociación Esperanza Salnés. Dicíase textualmente: “a asociación Esperanza Salnés, que cumpre cun importantísimo labor de atención a nenos discapacitados, necesita fondos para poder superar a crise económica permantente na que vive (…) cando non chegan salta a alarma e a carencia económica tradúcese en ameaza de peche. Vímolo xa unhas cantas veces, e sempre acaban saíndo tanto Louzán coma Tourís/Aragunde ás palestras públicas como rescatadores da asociación.

(…) o que precisa a asociación é un convenio económico estábel que lle permita vivir sen estar dependendo de se Louzán decide dar a subvención ou non. Pero xa se sabe que iso só xeraría unha nova cada moitos anos e ir poñendo en situación crítica e ao mesmo tempo saír ao rescate de Esperanza Salnés cada ano mantén na prensa a idea de que o Partido Popular é un firme defensor dos servizos sociais.”

Pois arriba temos a nova de hoxe do Diario de Arousa. A Deputación, por enésima vez, sae na axuda de Esperanza (algo moi louvábel se non tiverámos en conta os precedentes) e faino, iso si, só até fin de ano. A partires de aí Esperanza voltará a pedir axuda e Louzán volverá nuns meses a conceder outra pequena subvención. Así, a contagotas, que sae na prensa unha vez cada medio ano. E iso si que cunde.

Algúns datos da historia de Esperanza:

–Xa en 2002 pedía axudas á Xunta de Fraga. O seu carácter privado dificuldaba a obtención das subvencións, segundo o goberno.

-En repetidas ocasións reclamou a diferentes institucións o seu apoio por estar ao borde da quebra, por exemplo en 2004 á Mancomunidade, en 2005 á Xunta bipartita ou en 2006 aos Concellos da comarca.

-Pero o que sempre reclamou a asociación foi un convenio estábel que garantise a súa viabilidade económica e rematara coas constantes ameazas de peche. Pediullo á Deputación algunha vez, sen éxito, e nunha entrevista en 2006 o xerente queixábase de que ningunha institución aceptaba ese convenio permanente. Está claro que iso non vende electoralmente.

-A Deputación, pese a negarse a rematar cos problemas de Esperanza de xeito eficaz, foi concedendo axudas de pouco en pouco. En 2003 até en tres ocasións (1,2,3), en 2004 unha vez máis, e en 2006 outra vez,  ao igual que en 2007. No ano pasado, 2009, foi  en novembro cando se asinou a última axuda. É dicir, cada ano aparece na prensa como salvadora.

-Durante o comezo da lexislatura do bipartito na Xunta, Esperanza e Deputación acusaron a Vicepresidencia de non colaborar. O departamento que dirixía Anxo Quintana argumentou que Esperanza non cumpría unha serie de requisitos legais e ofreceuse a axudala a regularizar a súa situación. O Partido Popular saiu en rescate da Asociación e Vicepresidencia declarou que a pesar da situación de Esperanza as axudas concedidas polo ente autonómico dobraban ás da era Fraga.

-O ex alcalde de Vilgarcía, Javier Gago, acusou a Louzán de utilizar a Esperanza politicamente. Ademais denunciou que o PP votara en contra de que a Mancomunidade destinara unha partida fixa nos orzamentos para fns sociais.

-En 2010 deste esta web se propoñía que non se convidara aos membros do PP ao Xantar do Albariño cos cartos de tod@s e empregar eses fondos a asinar un convenio estábel con Esperanza. Non houbo resposta e si houbo Xantar.

-Esperanza ten recibido fondos tamén de iniciativas solidarias, como a do calendario en 2007, actividades por parte de Zona Centro ou festivais e ceas (esta última tamén copada polo Partido Popular).

Subscríbete aos avisos ao email de Cambados(tk). ^{Recibirás un correo os días que haxa algunha publicación. Só tes que introducir o teu enderezo neste enlace. O email non será nin sequera facilitado a Cambados(tk), é un servizo automático de Google.}

O alcalde responde o email de Cambados.tk

Coincidindo co lanzamento do vídeo crítico co Xantar do Albariño na Rede, que podes ver na anotación anterior, o alcalde Luís Aragunde remitía a través do Gabinete de Prensa do Concello a resposta ao email que se enviaba unha semana atrás e que lle solicitaba que os cartos que se aforrasen dun hipotético reaxuste do Xantar do Albariño se destinasen a asinar un convenio estábel con Esperanza Salnés.

No seu cordial email (que podes ler íntegro premendo aquí) Aragunde non é capaz de argumentar a favor de que se lle pague a comida a máis de 600 persoas, a maioría ligadas ao Partido Popular, senón que se limita a soster que “este evento coñecido en todo o país e fóra das nosas fronteiras naceu, precisamente, nun xantar onde diferentes adegueiros e personalidades daquel momento se xuntaron para ensalzar e competir polos mellores caldos da bisbarra”.

Algo que evidentemente é certo, como tamén poñemos de manifesto no vídeo crítico que lanzamos, pero que dista moito da realidade en que se converteu o Xantar do Albariño hoxe en día.

Naquel email que lle enviabamos hai unha semana tamén se solicitaba unha entrevista para este medio, tal e como suxeriron os lectores a través do grupo de Facebook. Nada comentou o alcalde ao respecto, a entrevista terá que agardar.

Desde aquí agradecerlle a Luís Aragunde o seu tempo, xa que a pesar de non ter recibido a resposta que se desexaba, tamén é certo que agora sabemos que polo menos os veciños poden contactar con el a través da páxina web oficial de Cambados.

Aragunde aprende rápido de Tourís: "As críticas xa deberían formar parte do programa do Albariño"

O programa do Albariño, que adoita saír en datas próximas á festa, acostuma recoller unha programación duns seis meses; tres adiante e tres atrás. Pero o alcalde vai máis alá, aínda que “ironicamente”, e contesta ás propostas de aforro entorno ao Xantar do Albariño coa seguinte frase (máis propia de Tourís que del mesmo, pero parece que Aragunde aprende rápido do ex alcalde):

“as críticas do Bloque e máis do PSOE nestas datas tamén forman parte da Festa do Albariño e talvez deberían de incluírse no programa” (La Voz de Arousa 13/7/10)

Segundo este diario rexeitou tamén o rexedor a proposta lanzada desde este medio de crear un convenio estábel con Esperanza Salnés cos case 30.000 euros que se aforrarían se os comensais do Xantar pagaron o seu prato.

Proposta que foi suscrita pola Asociación Unha Grande Chea e por particulares como a profesora Maribel Iglesias Baldonedo desde o blog O Umia. Maribel tamén empregou a ferramenta Fala co alcalde da páxina web oficial para deixar claro “como veciña de Cambados e contribuínte” que “non están os tempos para “comilonas”, hai quen o precisa máis, o que vaia á comida que a pague do seu peto”. Ti tamén podes enviarlle unha mensaxe a Aragunde desde Cambados.es.

Desde Cambados(tk) estamos á espera da resposta do alcalde tras 48 horas e agardamos que finalmente chegue e que, xa que non parece que o Xantar vaia a organizarse dun xeito limpo e xusto, polo menos poidamos ter a conversa con el que os lectores demandaban hai unhas semanas en Facebook.

Luís Aragunde recibe un email de Cambados.tk

Hoxe, e a través do servizo da web oficial Cambados.es Fala co Alcalde, foi enviado un correo a Luís Aragunde coa proposta de invertir os cartos que se aforren do Xantar do Albariño en asinar un convenio estábel con Esperanza Salnés. A pesar disto, tanto onte coma hoxe, o Diario de Arousa recolle declaracións do alcade de Cambados que confirman que o goberno local quere seguir adiante co Xantar e previsíbelmente voltará a convidar a cargos (e non cargos) do Partido Popular a comer gratis o domingo do Albariño.

ENTREVISTA PARA CAMBADOS.TK

Aproveitando a misiva, solicitóuselle tamén a Luís Aragunde unha entrevista neste medio que se realizaría cando e onde el mesmo quixera. Esta solicitude responde tamén a unha pregunta que foi lanzada o pasado mes no grupo de Facebook de CTK onde se preguntaba aos lectores que que persoa lle gustaría ver entrevistada no medio. A resposta foi unánime para o alcalde de Cambados, veremos se finalmente é posíbel a conversa. A pelota está no seu tellado.

Arquivos: Copia do email enviado a Luís Aragunde

A imaxe foi extraída da páxina web oficial de Cambados

Que facer cos cartos que se aforren do Xantar? Unha proposta: convenio estábel para Esperanza

Cada certo tempo lemos nos xornais que a asociación Esperanza Salnés, que cumpre cun importantísimo labor de atención a nenos discapacitados, necesita fondos para poder superar a crise económica permantente na que vive. Permanente porque subsiste grazas ás aportacións dos pais e nais e colaboradores (inclúanse aquí fermosas iniciativas como a do calendario benéfico de hai un tempo)  e de subvencións de institucións públicas. Depende absolutamente destas, e cando non chegan salta a alarma e a carencia económica tradúcese en ameaza de peche. Vímolo xa unhas cantas veces, e sempre acaban saíndo tanto Louzán coma Tourís/Aragunde ás palestras públicas como rescatadores da asociación.

Desde Esperanza xa o reclamaron algunha vez: o que precisa a asociación é un convenio económico estábel que lle permita vivir sen estar dependendo de se Louzán decide dar a subvención ou non. Pero xa se sabe que iso só xeraría unha nova cada moitos anos e ir poñendo en situación crítica e ao mesmo tempo saír  ao rescate de Esperanza Salnés cada ano mantén na prensa a idea de que o Partido Popular é un firme defensor dos servizos sociais.

Pero que pasa en Cambados? En 2008 desde o Concello adicóuselle a Esperanza unha partida de 8.000 euros. Pero vimos recentemente que se o goberno local deixara de convidar a comer gratis a cargos do Partido Popular no Albariño poderíanse aforrar case 30.000 euros. É o Partido Popular garante duns servizos sociais de calidade? E por que entón en lugar de gastar os cartos nese xantar non asina xa o Concello un acordo estábel con Esperanza por un valor, por exemplo e polo menos, de 20.000 euros anuais? Desde logo que o cidadán entenderíao moito mellor que que se gasten en pagarlle a comida a alguén por motivo ideolóxico!

O QUE OPINAN OS LECTORES DE CTK

A través da páxina de Cambados(tk) na rede social Facebook preguntóuselle aos lectores que opinan da proposta do Bloque de eliminar o Xantar e aforrar os cartos. Todos os que responderon o fixeron afirmativamente, algúns con matices, como Manuel, que opina que non debe eliminarse pero cadaquén debería pagar o seu menú, o mesmo que opina Milo. Sandra propón organizar unha cea alternativa e popular, pero popular do pobo e sen ideoloxías de por medio, xa que o Xantar Oficial “cheira a PP que bota para atrás”.

E ti, que farías cos 27.000 euros?

Os lectores propuxeron algunhas alternativas interesantes. Na vertente máis lúdica suxírese a creación dun xantar pero para todo o mundo, xa que eses miles de euros darían para mercarlle aos cidadáns bastantes tortillas e empanadas, mexillóns e chourizos. Carolina avoga por facer unha actividade lúdica pero para todo Cambados, non so “para os amigos do PP” ou aforrar os cartos para cando fagan máis falla.

Nunha vertente máis social Isma suxire comezar o centro de día con esa partida, Esther lanza varias ideas aínda que recoñece que vai máis alá de 27.000 euros; como mellorar o transporte público, crear unha oferta cultural decente, mellora do tratamento de residuos, menciona gardería e tamén fala do centro de maiores.

Como se pode ver, hai moitas iniciativas máis importantes onde invertir esa cantidade de cartos, queda por comprobar se o goberno local toma nota delas ou continúa unha Festa do Albariño oficial cada vez máis alonxada do cidadán e achegada ao Partido Popular.

Imaxe: Os tres promotores do calendario benéfico para Esperanza Salnés