//
arquivo

lingua

This tag is associated with 81 posts

Asaka, embaixador de Galicia no Xapón


Tivo lugar na tarde de onte a presentación dun libro moi especial sobre o noso insigne poeta Ramón Cabanillas. Especial, sen ir máis lonxe, pola orixe do libro. Publicáronse moitas cousas sobre Cabanillas en 2009, cando celebramos o seu Ano (de igual xeito que neste 2011 llo adicamos a Asorey) e fixéronse cantidade de actos relacionados con el. Pero o de onte, ademais de continuar esa estela, era especial porque chegaba de Xapón un exemplar que contiña textos do poeta traducidos a aquela lingua
Seguir lendo

Cabanillas en xaponés


Takekazu Asaka é un filólogo xaponés, profesor de castelán na Universidade de Tokio, moi interesado no noso país. Ese interese fixo que visite regularmente Galiza e que publicara traballos sobre a lingua e traducións.

A última titúlase Canta a Cabanillas e é unha tradución ao idioma nipón de 17 poemas do ilustre poeta cambadés. O libro preséntase este martes día 2 de Agosto na bilbioteca municipal (Casa dos Fraga) a partires das 20.30 nun acto no que ademais do profesor Asaka participarán o alcalde de Cambados, o técnico cultural e biógrafo de Cabanillas, Luis Rei e o académico Francisco Fernández Rei.

É unha iniciativa máis das librarías Cabanillas e Contos, colabora o Concello de Cambados.

Actos culturais mañá e pasado


EXPOSICIÓN-HOMENAXE A FRANCISCO ASOREY

Mañá mércores 8 ás 20 horas terá lugar no instituto que leva o nome do escultor a inauguración da exposición. Ademais de presentar esta mostra-homenaxe vaise dar a coñecer un vídeo documental e unha páxina web. Ao remate do acto servirase un viño grazas á colaboración da Adega Terra de Asorei. A exposición poderá visitarse no centro até o 21 de Xuño.

PRESENTACIÓN DE “LUME DE COBIZA”

A editorial Xerais, en colaboración coa libraría Ramón Cabanillas, organiza a presentación do novo título de Miguel Anxo Fernández “Lume de cobiza”. O acto será este xoves 9 ás 20 horas na biblioteca municial (na casa dos Fraga) e intervirán Ángel de la Cruz (director de cine), Saúl Otero (mestre e pintor) e o propio autor.

Emotiva entrega do Premio Ramón Cabanillas


Onte tivo lugar no auditorio a entrega do 8ºPremio Ramón Cabanillas, que recaía no profesor Emilio Xosé Ínsua, natural de Viveiro e cambadés de adopción. Como adoita ser habitual, o acto estivo cheo de  actuacións musicais (saxo, piano, acordeón e zanfona, guitarras e voz), de poesía e de entrañábeis intervencións como as do académico Fernández Rei, quen tamén leu unha carta de Luis Rei para felicitar a Ínsua, ou a breve de Saúl Otero para facerlle entrega dun regalo.

Xa que estamos en campaña comentar que no acto houbo representación ao máis alto nivel de BNG (Víctor Caamaño) e PSOE (Domingo Tabuyo) e ausencia do alcalde e candidato do PP, aínda que si é certo que asistiu o tenente de alcalde, Iglesias Pombo.

No discurso do académico Fernández Rei, houbo tamén mención ás eleccións municipais. Nun ton moi cordial, o membro da Real Academia pediulle ao próximo goberno que saia das urnas o vindeiro domingo que dea pasos adiante en relación coa cultura, por exemplo coa creación dun roteiro Cabanillas, coa defensa da mellora das condicións do lugar onde se atopan os restos do poeta cambadés (despois de tantos anos segue sen ter nin sequera o epitafio que el quería) e a posta en marcha da Fundación Ramón Cabanillas no noso Concello.

Sen dúbida, actos como o de onte, que nacen da ilusión, do esforzo e da vontade de colectivos ou persoas (como neste caso a dos libreiros de Contos e Cabanillas) son os que fan a diferenza. Para eles, e para tod@s os que participaron no acto de onte, parabéns. E parabéns tamén, por suposto, a Emilio Ínsua, quen a pesar de repetir do seu discurso que non era merecedor do premio,  é unha persoa comprometida fondamente coa defensa da lingua, da cultura e do país. E como tal, merecedor dun premio cada vez máis respectado como o que entregan desde hai oito anos os libreiros. Por moitos anos!

Queremos Galego! organiza un acto en Cambados


Será este martes 17 (día das Letras Galegas) ás 11.30 no Paseo da Calzada. A organización, que desde hai uns anos organiza unha manifestación central en Santiago de Compostela, decidiu este ano facer unha mobilización expansiva, con actos en moitos dos Concellos do país baixo o lema unitario “Paremos os ataques contra o galego”.

En Cambados, perante o monumento a Ramón Cabanillas, varias persoas lerán textos de autores galegos e actuarán a Asociación Cultural Nós de Sobradelo e a Asociación Cultural Xironsa de Cambados.

Ao remate lerase o manifesto da plataforma Queremos Galego para este Día das Letras de 2011, que lembra que quen debería ser o principar valedor do noso idioma, o presidente da Xunta, é hoxe en día o inimigo número 1 do mesmo, e repasa algunhas das reformas levadas a caba por Núñez Feijoo que supoñen un retroceso claro no desevolvemento da nosa lingua propia.

Emilio Insua recibe o sábado o Premio Ramón Cabanillas nun completo acto


Este sábado a partires das 21 horas vai ter lugar a entrega do VIII Premio Ramón Cabanillas que outorga a asociación de libreiros. Será no Auditorio da Xuventude e haberá poesía (recitarán Ramón Nogueira e Xose María Vila Ribadomar) e música (Aloia Ínsua e Manuel Antonio García Castro co saxo, Nacho González Castro coa zanfona e o acordeón, Miguel Costas ao piano e a actuación de Xoán Silva, Blas e Xaquín Xesteira).

Falarán Francisco Fernández Rei (académico) e Saúl Otero (pintor e mestre).

Organizan as librarías Ramón Cabanillas e Contos. Colaboran Unha Grande Chea, o grupo Xironsa e o Concello de Cambados.

"Pobrinh@, non sabe falar galego"


Interesante artigo o que publica o escritor Séchu Sende (lectura recomendada: Made in Galiza) sobre meniñ@s e lingua galega. Pódese ler estes días no medio dixital Galicia Confidencial, co cal Cambados(tk) colabora desde hai xa un ano por medio das súas canles comarcais.

No artigo, Sende repasa algúns dos prexuízos máis vividos e escoitados en relación coa lingua empregada para falarlle aos fillos, situacións que tod@s recoñecemos ao noso arredor e que son dificilmente explicábeis. Pero o mellor é acceder a GC e ler o artigo completo, podes facelo premendo neste enlace.

QUEREMOS GALEGO!, OUTRA VEZ Á RÚA

E como é tradicional este ano haberá máis unha vez mobilizacións a favor da lingua no Día das Letras, desta volta en diferentes Concellos do país, para denunciar os nefastos dous anos do Goberno de Núñez Feijoo en relación coa normalización do noso idioma. Ademais, no Palacio de Congresos de Compostela, terá lugar un grande acto nacional o 30 de Abril que congregará aos principais persoeiros da cultura en defensa do principio da plataforma Queremos Galego!.

Novos versos cambadeses na rede


Volve a ser o poeta Ramón Nogueira quen nos descubre unha nova voz artística de Cambados en internet. O seu nome é Silvia Fernández Chaves e tamén vén do instituto Francisco Asorey, onde segundo Ramón, gañou xa o premio de San Valentín polos seus escritos.

Nogueira vén de colgar un poema de Silvia no seu blog, chámase Minguante, e podes lelo en Flores Versadas ou tamén no blog da propia autora: Pingas de Cores. Non deixes de visitalo, queda tamén nos enlaces de Cambados(tk).

Debate sobre o galego nos clubs deportivos


Desde que na web de Unha Grande Chea publicaron un artigo sobre como o Club Xuventude Cambados de fútbol (oficialmente Club Juventud Cambados) emprega a diario o galego para todas as comunicacións, a polémica saltou á rede, chegando tamén ao libro de visitas de Cambados(tk).

Hainos que cren que o equipo de fútbol non é o mellor exemplo posto que aínda non galeguizou o seu nome e sinalan ao de baloncesto por si telo feito. Porén, un usuario lembra tamén que o club de baloncesto a pesar do nome galego”ten todos os seus contidos tanto de facebook, como da súa páxina web en castelán“. E o propio Club Xuventude de fútbol recalca no libro de visitas que “non galeguizamos o nome por problemas buracraticos con facenda e coa Federación” pero que “todo que facemos é en galego incluida a nosa propia páxina web“.

É unha pena que aínda existan atrancos para que unha entidade poida galeguizar o seu nome oficial. Pero como ben se dixo, o certo é que o Cambados cumple a día de hoxe coa nosa lingua empregándoa de xeito normal a todos os niveis. Ogallá os de baloncesto se sumen pronto tamén a esta boa práctica.

MANIFESTACIÓN VIRTUAL POLA LINGUA

Desde hai semanas circula nas redes sociais a convocatoria dunha mobilización en internet pola lingua galega. Consiste en colocar na foto de perfil do usuario a imaxe que se amosa arriba. Será o día 30 (domingo).

O Asorey estrea revista dixital: A Buxaina


A Buxaina é unha revista de carácter multidisciplinar, que xurde como colaboración entre os departamentos de ciencias do IES Asorey. Terá periodicidade mensual e responderá a un criterio científico de busca de información, investigación, sentido crítico, capacidade para comunicar, pero tamén que se entronque na realidade cotián do alumnado.

A Buxaina tamén reflictirá un compromiso permanente coa nosa língua, o medio ambiente a a sostenibilidade.

Dedicarase un apartado especial ao cambio climático, dentro do proxecto Climántica, no que o departamento de Ciencias está implicado desde hai varios anos.

O traballo de coordinación correrá a cargo do equipo de profesores e profesoras de Ciencias e na edición participará o alumnado.

A páxina está estruturada en varias seccións que coteñen novas, eventos próximos e contidos científicos agrupados segundo a temática.

Podes acceder xa a A Buxaina na dirección http://iesfranciscoasorey.dyndns.org e queda engadida na lista de enlaces de Cambados(tk).

Nas redes sociais

Maio 2021
L M M X V S D
 12
3456789
10111213141516
17181920212223
24252627282930
31  

Arquivo

RSS Praza Pública – Novas

  • An error has occurred; the feed is probably down. Try again later.
wordpress counter

Escribe o teu enderezo de correo electrónico para seguir este blogue e recibir notificación dos novos artigos.