Praza Pública, o novo xornal dixital galego

Hoxe é un día importante para a prensa dixital do país. Despois de meses de malas novas, de peches de diarios galegos e en galego como Galicia Hoxe, A Nosa Terra ou Xornal de Galicia, e de dixitais tan importantes como Vieiros.com e o propio Xornal.com, chegan as novas esperanzadoras. Presentouse onte á noite o novo xornal dixital Praza Pública, que nace cunha xustificación “A este país non lle convén o silencio”, cun modelo xornalístico plural e cunha liña que busca enriquecer o autogoberno e o cambio, o avance do país. Podes ver a presentación da web premedo aquí e mesmo apoiar a creación deste medio.
Ademais, hoxe púxose en marcha o novo Tempos Dixital, un suplemento á revista Tempos Novos na rede, que contará cunha liña galeguista e progresista e que pretende chegar a un grupo máis amplo de lectores que o seu referente en papel. E por último , lembrar que o Galicia Confidencial (con quen este medio colabora) segue a ofrecer información de interese e artigos do máis variado.