O Diario de Arousa publica hoxe unha información referente aos procesos de selección de persoal do Concello, neste caso dunha praza de docente no Conservatorio Municipal. A que fora directora do centro durante cinco anos, Lorena Varela, profesora de piano e linguaxe musical, vai presentar un recurso ante a súa exclusión do Conservatorio.
Ela asegura que foron “botándoa pouco a pouco” até que en 2011 perdeu a súa praza como profesora ante outra aspirante a pesar de que Lorena Varela a superaba con creces na baremación curricular. Fíxoo por culpa da entrevista, que valía 30 puntos (polo tanto decisiva) e na que a súa contrincante recibiu máis de 26 mentres ela se quedou con 15, os xustos para perder o posto.
É difícil saber como vai rematar este caso. Hai un precedente na historia do Concello por recursos contra os procesos de selección, o que protagonizou o actual Sarxento Xefe da Policía Local, Maximino Cid, quen logo de oito anos de reclamacións logrou que se impuxera a razón e conseguiu o que xustamente merecía e o que algúns membros do goberno local do PP quixeran evitar para, supostamente, entregar a praza a alguén máis afín. E aínda non sabemos cantos cartos dos cambadeses se gastaron os gobernos locais nos xulgados para defender procesos de selección viciados.
Conversa
Aínda non hai comentarios.