Que fixemos os cambadeses para merecer isto?

Onte coñeciamos polos medios de comunicación que a famosa escultura de Fraga, que o PP pretende poñer en Cambados, xa non será pagada con cartos públicos senón por subscrición popular do “sector do albariño”. Debemos aclarar, antes de nada, o que entende o PP por “sector”. Para o PP, sector do albariño refírese a calquera persoa afín a este partido político que sexa viticultor ou adegueiro; por exemplo algún dos seus concelleiros (por certo, dun dos cales agardamos a súa dimisión por construír sen licenza municipal unha plantación de albariño).  Pero, realmente, quen lle consultou ao sector do albariño de que ía ter que pagar esta estatua?: ninguén. Porque se por algo se caracteriza o xeito de actuación do PP, é por tomar sempre decisións unilaterais. Os demais non contan.

Neste asunto, o primeiro que quere puntualizar o BNG, é que foi  a presión popular a que conseguiu esta pequena vitoria de non pagar, con cartos públicos, a estatua do exministro de Franco. Con esta decisión, o PP demostra, de xeito máis acentuado aínda, que as súas actuacións carecen da máis mínima planificación: primeiro  pagábaa o concello, despois as administracións e agora subscrición popular do sector do albariño. Agardemos, á próxima semana, para ver con que  nova fonte de financiamento da estatua nos sorprende Luís Aragunde. Con este tipo de decisións, o alcalde, cada día ten menos credibilidade.

Do que non se enterou o PP, aínda,  é que o rexeitamento popular á escultura de Manuel Fraga é, sobre todo, político e ideolóxico. Fraga non concita consenso, senón crispación. E por moito que o queiran representar cunha copa de albariño nunha man, moitos sempre o veremos cun xugo e unhas frechas na outra. É un personaxe controvertido e que crea moitas discrepancias de criterio, razón suficiente como para non adicarlle unha escultura  nun espazo público.

Porque, ademais, de que a escultura de Fraga sexa pagada con cartos privados debería ser colocada nun espazo privado para que gocen dela quen realmente valora a este personaxe. E se a alguén se lle ocorre aportar un só euro para a construción desta obra, que primeiro reflexione sobre as grandes necesidades económicas que ten, actualmente, a maioría da xente e que mellor sería axudar a quen o necesita que tirar os cartos na memoria dun político franquista.

O BNG seguirá posicionándose en contra desta proposta do PP e seguirá criticando que o alcalde estea a preocuparse máis pola figura dun  controvertido expolítico como Fraga que polos 1.681 parados e paradas de Cambados.

Víctor Caamaño. Voceiro do BNG de Cambados. Podes ler o seu blog premendo aquí.