Cambados(tk)

Como información complementaria ao Episodio Tres: Episodio Serenísimo, publicamos algúns datos aos que nos referimos durante este capítulo de CTKast.

GASTO PÚBLICO DO CONCELLO PARA A FESTA DO ALBARIÑO

Este foi un dos temas máis discutidos nos últimos anos entre oposición e goberno. Nos anos de goberno popular foi un dato moi difícil de conseguir, sobre todo en termos desglosados. Coa entrada do goberno de cambio en 2015, publicáronse non só os datos do novo goberno senón os de varios anos anteriores (con excepción de 2011, non dispoñíbeis).

Todas as partidas adicadas á Festa desde o goberno local sumaron desde que hai rexistro público máis de 200.000 euros. Ben é certo que o custo para as arcas locais descendeu desde que o novo goberno tomou as rendas do Concello. Aínda que hai que tomar con precaución os datos, xa que do novo goberno só temos información de 2015 e non desta última Festa de 2016 (aínda non revelados). Aínda así, nese ano 2015 o goberno local reduciu nun 26% o gasto para a Festa en comparación coa media dos datos de catro dos últimos gobernos do PP. Un descenso que superaría o 30% se o comparamos co ano 2010, o gasto máis alto dos que se teñen rexistro. Se falamos de gasto con respecto aos Orzamentos totais do Concello, a Festa do Albariño superou amplamente o 2% do orzamento, sendo dun 3.7% en 2010 e descendendo até o 2.45% do total en 2015.

VENDA DE BOTELLAS E CATAVIÑOS

Un dos temas que tratamos en CTKast é como podemos cuantificar a afluencia á Festa. Unha das medidas que se empregan logo de cada Festa é o dato facilitado pola Consello Regulador sobre o número de botellas de viño vendidas nas casetas d’A Calzada. Este número aumentou moito nos últimos anos, pasando de 60.000 botellas en 2009 a 95.000 nesta última edición de 2016, a maior cifra rexistrada nunca. A figura de embaixo reflicte os datos oficiais do Consellor Regulador das Rías Baixas diseminados por múltiples medios. O descenso puntual de 2014-2015 relacionouse coas condicións metereolóxicas durante os días da Festa. (Nota: Os datos de cataviños, máis modestos, non puideron obterse para 2011-2013)

CONVIDADOS AO XANTAR DE ALBARIÑO: DATOS ESCANDALOSOS

No momento da gravación do podcast non contabamos máis que cos datos máis recentes de convidados ao Xantar do Albariño. Aínda que pareza incríbel,  non existían datos publicados serios sobre o asunto. A única lista que foi feita pública foi en 2010 e tratábase dunha lista pouco veraz. Incluía a menos de 300 persoas, cando era publico que asistían máis de 600, unha grande parte co convite subvencionado polo Concello, e non incluía convidados tan obvios como o propio alcalde de Cambados. Aínda así, a lista permitía comprobar o que é sabido, que unha grande parte das persoas que comían de balde eran membros do Partido Popular (un 40% da lista publicada), e máis de corenta eran confrarías convidadas polo Capítulo Serenísimo pero sufragadas con cartos públicos.

Cambados(tk) enviou recentemente unha petición formal ao Concello de Cambados (vía páxina de transparencia) para acceder a máis documentación sobre este tema. Cómpre parabenizar ao goberno local actual pola colaboración amosada ao liberar estes datos. No día de hoxe recibimos resposta por parte do responsábel da web de transparencia, Xurxo Charlín. A seguir amosamos unha análise dos datos recibidos, e ao final do artigo podes descargar tanto o noso arquivo Excel con todos os números publicados hoxe por nós, como tamén a información que recibimos do Concello.

O Concello revelou datos dos últimos dez anos. Desde 2007, o ano máis escandaloso foi 2009, no cal o Concello sufragou a entrada ao Xantar a 701 persoas. Asistiron ese ano un total de 900. A media de convidados durante os anos do PP foi de 559 persoas a cargo das arcas públicas. A media de convidados do goberno de coalición foi de 359 persoas. Tal e como comentamos no podcast, o novo goberno si que recortou o número de convites gratuitos ao Xantar (e incrementouse o número de persoas que pagan por asistir). En base á lista publicada polo executivo de Aragunde en 2010 sabemos a que tipo de persoas convidaban os gobernos do PP (maioritariamente a cargos e non-cargos do seu partido). Pero…a quen convida o novo goberno? Fontes municipais informaron a Cambados(tk) de que en 2016 o Concello entregou 64 entradas á Denominación de Orixe, incluíndo catadores do premio do Albariño, 108 a  adegas que cederon cadansúas dezaoito botellas de viño, 54 ao Capítulo Serenísimo (cada vez se entenden menos as súas queixas), 20 a patrocinadores da Festa, 14 a autoridades, e 24 a xornalistas.

Do mesmo xeito, fontes municipais comentaron que o descontrol nos convites durante os gobernos do Partido Popular era patente. O ex Presidente da Xunta Manuel Fraga, por exemplo, recibiu segundo listas de convidados de hai anos non un, senón que entre 8 e 17 pases, e ducias de cargos do PP figuran nas listas, incluíndo senadores, numerosos deputados de todos os tipos, conselleiros, alcaldes, e concelleiros…non só de Cambados senón tamén doutros municipios. O máis escandaloso, na lista do ano 2000 figuran dez entradas gratis a “Partido Popular”, sen máis explicación, a maiores de todas as outras entradas nominais a xente do PP

Estas datos sobre o Xantar son unha mostra perfecta da combinación de descontrol, despilfarro, e amiguismo practicados polo Partido Popular no Concello de Cambados nas lexislaturas nas que ostentou o poder municipal.

O custo por persoa do Xantar do Albariño foi de 50 euros entre 2007 e 2014 (gobernos do PP), co que o gasto público puido chegar aos 35.000 euros no ano de máis convites. No primeiro Albariño organizado polo novo goberno o custo por persoa rebaixouse a 40 euros, que en 2016 convertíronse en 45 polo recargo de 5 euros destinados a Esperanza Salnés. (Nota: No podcast dixemos erroneamente que o custo era sobre 50 ou 55 euros).

Máis información

–Volve a escoitar o Episodio de CTKast sobre o tema

–Descarga un arquivo Excel cos datos presentados no programa e neste artigo

–Datos cedidos polo Concello de Cambados

–Resposta do Concello á solicitude de información (contén facturas)

Escoita o Episodio 3 sobre este tema aquí:

Ir a iVOOX para descargar

Presentación do Albariño 2015 (Faro de Vigo)

Episodio Tres: Episodio Serenísimo. Neste capítulo de CTKast falamos da organización da Festa do Albariño. Tratamos o resultado da Festa de 2016 así como os cambios introducidos nos útlimos dous anos polo goberno do cambio. Adicamos unha boa parte a tratar de analizar que é o chamado Capítulo do Serenísimo e que relación debe ter o novo goberno local con esta entidade.

O programa inclúe unha entrevista co tenente de Alcalde e concelleiro de Cultura, Víctor Caamaño, co que ademais do Albariño falamos da súa área de goberno.

Para rematar, viaxamos até Gran Bretaña, onde conversamos con André, cambadés que leva uns catorce anos vivindo e traballando en Inglaterra.

Ir a iVOOX para descargar

Podes escoitar este capítulo empregando o reprodutor que aparece enriba, ou tamén podes descargar o audio e escoitalo no dispositivo da túa preferencia cando teñas tempo libre seguindo este enlace. Non dubides en deixar comentarios coas impresións, críticas e ideas…tanto aquí como no Facebook ou Twitter.

Nota – Fe de erros : durante a gravación mencionouse que o custo das entradas ao Xantar é de “sobre 50 e 55 euros” e isto non é certo. O custo era de 50 euros durante os gobernos do PP e descendeu a 40 coa entrada do novo goberno (45 e 2016 polo donativo de 5 euros a Esperanza Salnés)

Máis información sobre os temas tratados:

– Datos sobre o Xantar e outras cifras (info complementaria ao Espisodio 3)

–O Capítulo Serenísimo rexeita retirar o nomeamento a Jaume Matas (2015)

–Entrevista a Víctor Caamaño en Cambados(tk) (2012)

–Xantar do Albariño de 2012, máis de 600 convidados (2012)

–Lista de convidados ao Xantar facilitada polo Concello en 2010 (2010)

–Xantar do Albariño: quen son e por que comen gratis? (2010)

A asociación GaliciAME, xunto con AGAELA e AVEMPO, organiza o primeiro congreso de AME (atrofia muscular espiñal), ELA (Esclerose Lateral amiotrófica) e esclerose múltiple no noso Concello.

Será durante os días venres 2 e sábado 3 de Setembro no Salón de Congresos José Peña de Cambados. A cota de inscrición é de entre 10 e 20 euros, dependendo da situación laboral do participante, máis o prezo dos xantares opcionais. O programa inclúe charlas de expertos nos temas nos que se centra o congreso, tanto do noso país como de resto do Estado. É o primeiro congreso destas características que se celebra na provincia.

Consulta aquí o programa do Congreso

Descarga a folla de inscrición

Como material complementario ao Episodio Dous: Repaso ao primeiro ano de cambio, quixéramos adxuntar información da que falamos no podcast.

SALARIOS DO GOBERNO LOCAL

En primeiro lugar, tratamos o tema dos soldos. Como xa publicáramos en A Ti Meu Cambados no mes de Xaneiro, os soldos do goberno cuatripartito son practicamente iguais que os da lexislatura pasada. A diferenza radica en que agora só perciben salario representantes electos democraticamente, e non asesores a dedo. Co executivo de Luís Aragunde cobraban tanto o alcalde como o tenente de alcalde, como entre dous e tres (dependendo do ano) asesores postos a dedo polo Partido Popular. Na figura de embaixo, realizada con información oficial de rendiciondecuentas.es e transparenciacambados.gal, pódese apreciar isto.

DURACION DOS PLENOS E INICIATIVAS PRESENTADAS

Outro dos temas que tratamos é a queixa do Partido Popular porque se realizan agora o dobre de plenos (antes só se facía o mínimo que marca a lei). Segundo o PP, Cambados non xera contido suficiente como para encher un pleno ao mes, e din que os plenos agora están baleiros de contido. Se ben é certo que o partido da oposición non axudou moito durante o primeiro ano a encher os plenos (presentaron moi poucas mocións, e de feito tardaron catro meses en presentar a primeira), comparamos tanto a duración dos plenos neste ano cos da lexislatura pasada como o número de puntos da orde do do día, e concluímos que no existe diferenza entre os plenos agora antes. Tendo en conta que agora se convocan o dobre de plenos, isto quere dicir que agora se debate o dobre que antes, resultando nunha mellora no funcionamento democrático do Concello. O Partido Popular, ademais, como oposición, vese beneficiado con isto xa que o pleno é practicamente o único rol institucional que xoga e lle dá visibilidade perante a cidadanía de Cambados. Nas figuras de embaixo, a lonxitude das barras representan a media de dez plenos e os corchetes unha desviación estándar.

Tamén estudamos quen defendeu cada moción presentada no último ano e desglosamos as iniciativas dependendo de quen as defendeu en Pleno. O resultado amosa que Xurxo Charlín (SC) foi a persoa máis activa nos plenos, con arredor do 35% das iniciativas defendidas. Seguírono Tino Cordal (SC), Fátima Abal (PSdeG-PSOE) e Víctor Caamaño (BNG). Este pequeno estudo sobre os plenos fixémolo analizando as actas dos dez últimos plenos desta lexislatura (até Maio) e as dez últimas actas dispoñíbeis da anterior lexislatura, todo isto atopado en transparenciacambados.gal. O estudo completo pódelo descargar en formato Microsoft Excel neste enlace (fíxate que hai dúas pestanas, unha sobre duración de plenos e outra sobre autoría das mocións).

CUSTO DA FESTA DO ALBARIÑO

Outro dos datos que dabamos durante o episodio era o do custo da Festa do Albariño, que se reduciu en 2015 con respecto ao custo da Festa durante os gobernos do PP nun 26%. Os datos foron tirados da web oficial do Concello, xa que despois das Festa de 2015 o novo executivo publicou o desglose de gastos non só de 2015 senón de anos anteriores, que nunca se fixeran públicos dese xeito.

CUMPRIMENTO ACORDO DE GOBERNO

Na parte final do episodio, facemos referencia a unha pequena análise que fixemos para avaliar o cumprimento do Acordo de Goberno das catro forzas do cambio. Dos 34 puntos que se recollen no acordo, están cumpridos 17 (a metade), mentres que non se empezou a traballar en 11 (arredor dun terzo) e 6 estaban en progreso no momento en que fixemos o estudo. Podes consultar cada un dos puntos do programa, xunto coa nosa availiación e comentarios, premendo neste enlace (arquivo formato Microsoft Excel). Aínda que é satisfactorio que nun 25% da lexislatura se cumpriran tantos puntos, queremos incidir en que o Acordo non recolle todas as cuestións que o goberno local debe abordar nestes catro anos, así como tamén é certo que moitos dos puntos se refiren a funcionamento do Concello, e no caso de mudar a xestión en temas como transparencia, a avaliación positiva deses puntos podería mudar outravolta.

Máis información sobre os temas tratados:

–Análise do cumprimento do Acordo de Goberno (descarga arquivo Excel)

–Análise da duración dos plenos e das mocións defendidas por cada concelleiro (descarga arquivo Excel)

–Escoita ou descarga o Episodio Dous neste enlace.

Os líderes das catro forzas do cambio (Diario de Arousa)

Episodio Dous: Repaso ao primeiro ano de cambio.  En Maio de 2015 os cidadáns de Cambados decidiron poñer fin a 28 anos de goberno do Partido Popular. A investidura de Fátima Abal como primeira alcaldesa cos votos de PSdeG-PSOE, BNG, Somos Cambados e Cambados Pode colleu a moitos por sorpresa, incluída a propia Fátima. Días despois, asinábase o pacto de goberno coas propostas e reparto de áreas e dedicacións exclusivas.

Está a cumprir coas expectativas o goberno do cambio? Cumpre coas medidas do acordo de goberno? Mellorou ou empeorou o noso Concello? Neste episodio especial de CTKast analizamos o primeiro ano de goberno cuatripartito. O programa inclúe entrevistas con Xurxo Charlín, concelleiro de Economía e Facenda e portavoz do Goberno, e con Fátima Abal, alcaldesa de Cambados.

Ir a iVOOX para descargar

Podes escoitar este capítulo empregando o reprodutor que aparece enriba, ou tamén podes descargar o audio e escoitalo no dispositivo da túa preferencia cando teñas tempo libre seguindo este enlace. Non dubides en deixar comentarios coas impresións, críticas e ideas…tanto aquí como no Facebook ou Twitter.

Máis información sobre os temas tratados:

–Análise do cumprimento do Acordo de Goberno (descarga arquivo Excel)

–Análise da duración dos plenos e das mocións defendidas por cada concelleiro (descarga arquivo Excel)

–Entrevista con Fátima Abal en Cambados(tk) de Nadal de 2012

–Páxina web de Transparencia do Concello de Cambados

-Audio: O ex alcalde non permitía gravar os plenos (2012) 

–Artigo en ATMC “Unha ollada ao medio ano de cambio”. Xaneiro de 2016

Programa do PP de 2003

Como complemento ao Episodio 1 “Aquí non hai praia”, deixamos uns cantos enlaces a novas e artigos sobre a historia das praias artificiais.

2008 (con recopilatorio desde os noventa) – “El eterno aspirante al sol y playa”.

Artigo da cambadesa Maruxa Alfonso que repasa todas as promesas de praia. Segundo isto, foi Santiago Tirado o primeiro impulsor da idea da praia artificial. De feito, foi con el co que se botou area no porto de San Tomé (e puxéranse duchas) mais non callou como lugar de baño polos barcos e a insuficiente marea. El quixo facer unha obra máis grande, unha praia “en condicións”, pero a idea desbotouse porque “non era moi popular”. Tentou ubicala a carón do parque. Fixéronse informes de Costas e estudouse dragar a zona pero a obra parou pola oposición das mariscadoras.

Onde si se botou area foi nunha zona de Tragove. Houbo proxecto para Montes Outeiro (onde están as depuradoras),e botouse area fronte a estación de buses (que como zona de baño nunca se usou).

2003 – El PP promete una playa artificial en Tragove y pide a sus seguidores el voto de familiares y amigos

Campaña electoral municipal de 2003. No mitin de presentación do programa do PP a “obra estrella” do candidato á reelección Tourís era unha praia artificial en Tragove.

O programa incluía  ampliación do espigón de Tragove e unha grande praia , mirando a Cambados, de dimensións desorbitadas. Ademais desta praia enorme tamén se prevía unha praia por toda a costa desde o peirao de Cambados até o de Tragove, na ribeira de Fefiñáns.

2010 – Aragunde plantea a Costas la necesidad de construir una playa urbana y de sanear el litoral

Aragunde considera que esta é unha actuación “prioritaria”. A praia da que fala Aragunde estaría no Saco de Fefiñáns, mais tamén fala de unir Fefiñáns coa Casa do Mar cun areal, do mesmo xeito que o fixeran antes Tirado e Tourís.

2012 – “Co PP na Xunta, teremos praia en Cambados” di Aragunde no mitin

Autonómicas de 2012. O entón alcalde de Cambados pide o voto para reelixir a Feijóo para que Cambados teña praia. Isto xa nun momento en que a crise estaba totalmente en auxe e se recortaba en ensino e sanidade.

2015 – Somos Cambados carga contra Aragunde por prometer dos playas fluviales

Tino Cordal, na campaña das municipais, criticou que o PP prometera dúas praias, unha en Oubiña e outra en Vilariño, esta vez fluviais.

Episodio Piloto – Fefiñáns, Guatemala. Primeira entrega deste novo proxecto. Despois dunha breve introdución sobre CTKast, entramos de cheo no tema central; a peonalización (ou non) da Praza de Fefiñáns. Repasamos a polémica do mes pasado xerada entorno a pechar ao tráfico a Praza durante a Semana Santa e a crise de goberno asociada. Para afondar no tema de fondo, a peonalización, falamos con Iago Pillado Losada, un dos promotores da páxina de Facebook “Peonalización da Praza de Fefiñáns”. Para rematar, conversamos con Manuel Silva Rey, cambadés que leva xa tres anos na Cidade de Guatemala. Ao final do programa escoitamos un tema musical moi especial.

Ir a iVOOX para descargar

Podes escoitar este capítulo empregando o reprodutor que aparece enriba, ou tamén podes descargar o audio e escoitalo no dispositivo da túa preferencia cando teñas tempo libre seguindo este enlace. Non dubides en deixar comentarios coas impresións, críticas e ideas…tanto aquí como no Facebook ou Twitter.

Cambados(tk) puxo fin neste Marzo de 2016 á “tregua” que declarou en Decembro de 2012. Aínda así a actividade non retornará a CTK do mesmo xeito que no período anterior, senón que o fará nun formato diferente.

Cambados(tk) comeza unha nova aventura na rede; un podcast, que non é máis que un arquivo de audio gratuito que poderás escoitar online ou descargalo para oir cando mellor che vaia. CTKast é o nome desta nova aventura, na que pretendemos abrir debates sobre temas municipais e máis alá, con información, entrevistas, e análise crítica. Tamén se fará especial fincapé en conectar coa comunidade cambadesa no exterior.

CTKast será conducido por Carlos e mais Óscar, polo cal será unha produción cambadesa-americana. O venres 29 de Marzo publicarase o episodio cero, ou capítulo piloto. Agardamos contar convosco non só para escoitar senón para compartir, debatir, e criticar.

A estatua convertida en Batman | @ManuBusto5

A estatua de Fraga amenceu pintada por segunda vez en un mes. Se a finais de Novembro os “artistas” elixiron a Superman para decorala, con pintura vermella na capa e un símbolo no peito, agora tocoulle o turno a Batman. Polo menos así o reflectiron co morcego característico plasmado no peito, aínda que ademais os pantalóns da escultura foron cubertos de amarelo.

O curioso de todo isto é a rapidez coa que o Concello (presuntamente, claro) limpou a pintura. Se ás 12.30 se difundía en Twitter a imaxe da pintada, pouco máis tarde da unha xa estaba medio limpa. Da anterior vez, o Concello asegurara que a limpara rápido porque estaba a máquina de limpeza a presión na zona, pero restaran importancia ao sucedido porque segundo Aragunde “hai que darlle o mesmo valor que se fora un banco ou a escultura de calqueira outro persoeiro”.

Polo de agora, non hai reaccións oficiais ao acto desta noite, aínda que parece complicado manter agora que non hai relación entre estes actos e o malestar que causou a instalación da estatua en Cambados. Na rede, a imaxe estase a extender moi rapidamente, a pesar de que os medios convencionais non se fixeron eco da nova por agora. Os comentarios retranqueiros son os máis extendidos, e hai usuarios que solicitan que para “a próxima” sexa Spiderman o que se plante en Torrado.

A estatua xa “limpa”. Nótense os restos das diferentes pinturas

Por motivos persoais, Cambados(tk) vese na obriga de declarar unha tregua indefinida na súa acción e difusión. Pode que sexa abordada máis ou menos progresivamente (dependendo da dispoñibilidade destes días e dos temas de actualidade), pero a decisión é firme. É un alto no camiño, nun camiño de máis de sete anos e medio que percorrimos xunto a vós e que a vós en definitiva debemos.

Grazas pola vosa atención, simpatía e colaboración.

Se queres, podes ler o artigo de Óscar Pardo Planas referido a este tema.

A nova noutros medios

A ti meu Cambados – Un día triste para o Cambados progresista e alegre para o conservador

Rif-Rock – Unha tregua de CTK

Vivir Cambados – Cambados(tk) fai un alto no camiño

Dos Vueltas de Tuerca – Cambados(tk) anuncia una tregua

Asoblog – Sorrisos e bágoas en Asoblog

Como xa reflectimos aquí hai uns días, o alcalde non fixo nada por impedir que gravaramos a última sesión plenaria do ano, logo dunha polémica entorno a este tema. A propia prensa referiuse a este feito, no caso de La Voz de Arousa non dubidaron en calificalo como o máis relevante -máis ben era o máis incerto- do pleno (xa que os demais asuntos eran máis ou menos de trámite). Nos primeiros puntos tratáronse aprobacións de taxas ou novas regulacións. A taxa de realización de tarefas de control e verificación de actividades e tramitación dos expedientes de licenzas de apertura ou actividade, foi aprobada cos votos do Partido Popular. O BNG votou en contra, porque considera que os cidadáns están a ver subas de impostos a diarios nun momento moi difícil, e PSOE abstívose. Este esquema repetiuse nos puntos seguintes. Tamén se modificou a taxa de outorgamento de licenzas urbanísticas (subiuse) e o mesmo aconteceu co imposto sobre construcións, instalacións e obras. Aprobouse unha nova ordenanza do procedemento para a concesión de licenzas de obras e de actividade, e de comunicación previa e declaración responsable. Todos estes asuntos están no vídeo “Varios (taxas…”. Seguir lendo →

Foto de luisaragunde.es

Luís Aragunde naceu en Fefiñáns e di coñecer á perfección todos os recunchos da nosa vila. “Unha persoa sinxela que sinte orgullo de ser cambadés”, así se definía na carta de presentación da web electoral de 2011. É traballador da lonxa en excedencia, e foi tenente de alcalde de Cores Tourís até 2009, cando o sucedeu na alcaldía.

Logo, nas eleccións de 2011 foi o candidato do Partido Popular e conseguiu un excelente resultado para a súa formación, nun momento en que o PP vivía a “marea azul” que expulsou ao PSOE das principais institucións do Estado. Esta podería ter sido, por exemplo, unha entrevista a Aragunde se nola tivese concedido algunha vez.
Preme en SEGUIR LENDO para ver a entrevista completa
Seguir lendo →

Ao comezo da sesión, a voceira do PSdeG-PSOE, Fátima Abal, pediu a palabra. “En memoria de Rafa Blanco” [o anteiror portavoz do PSOE, finado hai tres meses] quixo dirixirse ao alcalde, a quen lle lembrou dun xeito bastante efectivo a falla de educación que amosara Luís Aragunde no último pleno ao que acudira Rafael Blanco. Naquela ocasión, cun portavoz do PSOE visiblemente afectado fisicamente, canso, o alcalde espetáralle ante todos os presentes a cantidade de “faltas de ortografía” que segundo el contiña un escrito asinado polo portavoz socialista. Fátima Abal xa recoñecera na entrevista a Cambados(tk) de hai un par de semanas que aquelo non lle sentara nada ben ao propio Rafael Blanco nin aos seus compañeiros de filas. Unha “humillación innecesaria”, así o calificou na entrevista. Daquela, en CTK calificáramos o xesto de Aragunde como “unha terrible falla de educación”.

No pleno do xoves, Fátima Abal fíxolle ver a Luís Aragunde que o escrito da convocatoria do pleno que el asinara, contiña “en doce frases 29 faltas de ortografía” . Acusouno de non ver a viga no seu ollo cando si vira a palla no ollo alleo, naquela ocasión no dun compañeiro cunha enfermidade con resultado de morte. O alcalde quixo zanxar axiña a polémica e o pleno deu comezo. Podes escoitalo audio que encabeza a entrada. No que tedes a continuación podedes escoitar a intervención de Aragunde que desencadeou esta pequena polémica.

Un dos puntos do día do pleno do xoves era o debate e votación da moción do Bloque sobre o problema laboral de Paradores, que no caso de Cambados podería deixar tres traballadores na rúa. Os propios afectados e compañeiros estaban presentes ese día no salón de plenos, algo que quizais fixo que o desenlace do debate fora a unanimidade da votación. Isto quere dicir que a Corporación insta ao Goberno central a parar o plan de axuste de Paradores, impedindo os despedimentos e o peche dalgúns centros en Galiza. Ademais, pide que se realicen plans para mellorar a ocupación hosteleira no país, potenciando e mellorando a rede de paradores, e reclama que calquera plan que afecte á plantilla sexa negociada cos seus representantes. O curioso é que no texto expositivo da moción, que votou o Partido Popular a favor, dise textualmente que estamos ante un “plan, duro e salvaxe”, que contou  “co silencio cómplice e o beneplácito do goberno do PP na Xunta e dos alcaldes do PP nas vilas afectadas”. Ademais, do PP tamén di: “demostra a falta de xestión do PP, con capacidade demostrada para o recorte e o despido de centos de traballadores e traballadoras”. Podes ler a moción íntegra premendo aquí.

A nota “anecdótica” do debate púxoa o propio alcalde, que ao comezo da súa intervención, non deixou pasar a oportunidade para gabar a figura de Manuel Fraga, chegando a dicir textualmente que “Manuel Fraga foi quen construiu o Parador en Cambados”, por iso “lle debemos tanto a Fraga”. Parecía outra autoxustificación máis polo tema da estatua no canto dun debate sobre o problema laboral dos traballadores. O alcalde salientou que Cambados non era un dos centros en perigo aínda que dixo sentirse “sensible” ante calquera perda de postos de emprego, sobre todo ao poñerlle “nomes e apelidos”. O voceiro do BNG, Víctor Caamaño, fixo a defensa da moción que o seu grupo presentou poñendo de relevo a contradición entre a apertura de Pousadas por parte da Deputación e do feche de Paradores polo goberno central, e a do PSdeG-PSOE, Fátima Abal, argumentou o voto positivo do seu grupo lendo unha iniciativa do PSOE no Senado na mesma dirección.

Os dous escritos de Cambados(tk) a respecto de poder gravar os plenos e difundir estas imaxes ou son a través da rede, seguen hoxe sen contestación. Considerando este silenzo administrativo como positivo para nós, onte procedimos a acudir ao pleno cámara en man (deuse a casualidade de que Tele Salnés tamén tomou algunha imaxe do acto). A pesar das declaracións do grupo popular na prensa hai semanas, nas que recoñecían “estar fartos” de CTK e de que se filtraran á rede as actitudes dos concelleiros do seu grupo, onte o alcalde non interrumpiu a sesión (como na anterior vez) para advertir que non permitía gravar. Así pois, puidemos rexistrar integramente o sucedido, tendo lugar un pleno bastante monótono e moi medido nas formas -ao contrario que noutras ocasións-. Isto último puido deberse á presenza da cámara ou, máis ben, a que un grupo de traballadores de Paradores asistiron ao Pleno, un Pleno no que normalmente non adoitan sentar no público máis de dez persoas.

O Diario de Arousa cuestionou ao goberno local sobre a polémica das gravacións. O alcalde e os seus recoñeceron agora que as sentenzas que existen son favorables ao exercicio deste dereito, e que aínda non se posicionaron posto que solicitaron informes a “instancias superiores”. Segundo o Diario, o feito de que onte permitiran gravar pode ser temporal. Aínda así, vistas as sentenzas e os diversos informes xurídicos, resulta moi difícil de crer que esa “instancia superior” á que se refire Aragunde, vaia ser contraria á legalidade vixente. Polo tanto, todo aquel que queira gravar, tan só ten que presentar por cortesía un escrito como este no que informa ao alcalde de que o vai facer, baseándose no marco legal e no respecto á protección de datos. Aínda así, nós agardamos recibir resposta aos dous escritos que presentamos no rexistro do Concello, pasaron case dous meses desde que presentamos o primeiro.

No vídeo: o último cacho do pleno, no que Aragunde se refire ao acto de protesta de Lois Baúlo como “chegou un señor que se puxo en calzoncillos”. O BNG pediulle que se solidarizara cos afectados pola estafa das preferentes.

Debate sobre mocidade no Canal Rías Baixas (Tele Salnés – Barbanza) emitido o 19 de Nadal de 2012 no Canal Rías Baixas.
Interveñen Elena Shevrevera, voluntaria de Cruz Vermella, Fran Gómez, da Asociación Flor de Toxo de Ribeira, Óscar Pardo Planas, blogueiro de Cambados.tk, Félix González, Secretario Xeral das Xuventudes Socialistas do PSOE O Salnés e Diego Gago, Presidente provincial de Novas Xeracións do PP.

Lois Baúlo no Concello de Cambados | Martina Miser, La Voz

Este acto de protesta tivo lugar durante a mañá de hoxe. Primeiro, sucedeu na oficina de Novagalicia Banco de Corbillón, lugar onde reside o veciño Lois Baúlo. Logo, realizou a mesma acción nas dependencias do Concello de Cambados. A carón del, un cartel explicativo do seu caso: as preferentes leváronlle os máis de sesenta mil euros que cobrara como indemnización tras un accidente de tráfico que o deixou cunha discapacidade psíquica do 55%. Ten dous fillos, unha hipoteca, e a muller está no paro. A súa situación revela o que xa sabiamos: a desvergoña dos responsables deste expolio aos pequenos aforradores (que non inversores) do noso país, xa que moitos foron enganados e/ou abusouse da confianza que lle tiñan aos traballadores da súa sucursal. No Concello de Cambados, segundo La Voz de Galicia, foi desaloxado pola Policía Local (cuxas dependencias se atopan no mesmo edificio).

Dase a casualidade de que Baúlo foi o veciño ao que o Concello multou en Setembro por eliminar nas proximidades da súa casa unha especie vexetal invasora (as coñecidas como herbas da Pampa). Lois advertíralle en tres ocasións ao alcalde da perigosidade para o medio desta especie, sen que o alcalde tomara cartas no asunto. Foi entón cando se encargou de segalas el mesmo e recibiu por elo unha sanción económica de oitenta euros.

APOIAR A LOITA DAS PREFERENTES

Desde este humilde espazo, lanzar unha mensaxe de solidariedade cara este veciño e cara todos os que está a sufrir as consecuencias desta estafa masiva. Cómpre involucrarse con eles na reclamación dunha solución xusta. En Gondomar, afectados das preferentes iniciaron hai días un encerro nun caixeiro da entidade bancaria, ao que se sumaron hoxe deputados de Alternativa Galega de Esquerda, entre eles o propio Beiras.

A continuación reproducimos a entrada sobre o tema que redactou o blog “Vivir en Cambados”, xa que está moi ben explicada: “Lorena Acha é a blogueira de moda que dirixe If I Were a skirt, un dos blogs que forman parte da Asociación Asoblog Salnés.

Desde a constitución da asociación Lorena, xunto a outros membros da mesma, implicáronse na organización de diversos actos. Agora chégalle a quenda ao que é a súa especialidade, a moda, polo que se pode dicir que se este evento saíu adiante é grazas á súa enorme capacidade de traballo e ilusión. Seguir lendo →

Imaxe da arqueta nova a carón de Maza | BNG

Reflectíamos onte en CTK os problemas que está a causar o antigo piñeiral de Maza, unha obra que o BNG non dubida en calificar de ilegal por carecer de licenza urbanística e aténdose ao que din as Normas Subsidiarias do Concello sobre o seu uso. Pois ben, Víctor Caamaño denuncia nun escrito presentado hoxe no Concello que o o propio goberno local está adicando tempo e cartos a paliar os problemas que ocasiona a auga e a lama que baixan desde Maza cando chove. En concreto, o BNG afirma que persoal do Concello acudiu en diversas ocasións á zona para resolver problemas, co cal o Concello destina recursos a isto. Tamén son coñecedores no Bloque de que se instalou este ano unha beirarrúa e unha arqueta na entrada da finca, e presentan unha serie de cuestións sobre estes temas para ser respondidas en pleno (que será este xoves).

Unha das preguntas fai referencia á presenza da Policía Local na zona pola anegación da capela de San Antón. Os nacionalistas quererían saber se existen informes ao respecto e se poderían consultalos. Tamén queren saber cantas veces acudiron os operarios municipais no outono a resolver problemas xerados en Maza. O BNG pregunta tamén pola arqueta da foto: en concreto piden saber a razón da súa instalación e a data. Tamén se a finca de Maza ten algún tipo de sumidoiro conectada a esta arqueta, e se solicitou permiso para facer isto. Por último, o Bloque sabe que unha excavadora estivo a levantar a beirrarrúa a carón de Maza, e quere saber se esta obra foi realizada polas empresas vinculadas coa deforestación da parcela (Dismaterra e Cancelo, relacionadas cun concelleiro do PP e o ex alcalde Tourís por medio da súa dona).

Cando naceu Cambados(tk) hai case oito anos, denunciabamos naquela rudimentaria web a pouca presenza de Cambados na rede. O Concello, que tiña que ser pioneiro na utilización destes medios (daquela non ao alcance de todo o mundo) inhibíase e o resultado era un espazo na rede deficiente, tanto para veciños como para potenciais turistas. Estes días publicouse o primeiro dos spots realizados por Juan Galiñanes sobre a Festa do Albariño. Estes anuncios, moi ben presentados e realizados coa participación altruista de centos de persoas, demostran que as boas ideas e as ganas poden facer que un pobo como Cambados goce dunha boa proxección no exterior. Volvendo ao tema, ao final do vídeo, ademais da referencia á propia Festa do Albariño, introduciusea dirección da páxina web oficial do noso Concello: http://www.cambados.es. Ata aquí todo normal. Pero, que é o que falla? Seguir lendo →

Hai máis de un ano facíamonos eco da páxina web que poñía en marcha o departamento de ciencias do IES Asorey. Tratábase dunha revista dixital, co nome de A Buxaina. Nos últimos meses, por problemas técnico, a revista estivo parada. Pero agora volve ao “prelo” de internet cun cambio de imaxe e estrutura.

Desde o Asorey queren que esta publicación responda a un criterio científico de busca de información, investigación, sentido crítico, capacidade para comunicar, pero tamén que se entronque na realidade cotián do seu alumnado. Ademais pretenden que, como o seu nome indica, sexa activa, que amose as inquedanzas do profesorado e o alumnado e que se meta nas casas a través das pantallas dos ordenadores. Pero, tamén, e non menos importante, queren que sexa un compromiso permanente coa nosa língua, o medio ambiente a a sostenibilidade. Están abertos a colaboracións de calquera persoa interesada nestes temas, máis alá dos propios alumnos e profesores. Non deixes de (volver) visitar A Buxaina!

O caso do antigo piñeiral de Maza (agora reconvertido nunha gran superficie adicada ao albariño) deixou a vía política para entrar na xudicial, logo de que tal e como informaramos hai semanas o Bloque transladara ao Xulgado este tema. En resumo, convertiuse un terreo forestal nunha plantación de viñedo, sen, presuntamente, os trámites legais necesarios. Vinculados a estas obras están un concelleiro do PP de Cambados e o propio Jose Manuel Cores Tourís, volto a nomear hai tres días delegado da Xunta en Pontevedra. Seguir lendo →

Amor Umbilical, é o nome do novo proxecto de Bronquitis Crónica, ese nome que xa evoca a unha forma de entender o hip hop moi cambadesa. O novo traballo, co colectivo 504 con base en Santiago de Compostela, ten unha compoñente de Cambados fundamental: a de Alberto F. Escariz, Bad. Amor Umbilical déixanos 11 tracks, cada un deles nos suxire un universo lírico e musical exclusivo.

Todas producións propias salvo IN uTeRO e Superhéroe, coa sinatura de Pablouve. Unha mención especial merece a aportación de Dj Webo, presenta na maioría dos tracks, os complementa perfectamente cuns scratches tan innovadores como técnicos. Nas rimas, Amor Umbilical conta exclusivamente coa colaboración de Kotto, outro integrante de 504, no track Buitres II, segunda parte do track xa publicado nunha das últimas referencias do grupo (Arte Descatalogado, 2012). A mestura e masterización corre, máis unha vez, a cargo de Kaos, La Sombra del Humo. O deseño é unha homenaxe ao falecido .mono. imposible de levar a cabo sen a aportación de Glock D. Existe un debuxo asociado a cada tema que á vez que o completa, dótao dunha dimensión gráfica e estética acorde coa música e temática do mesmo.

Nunha reseña de Andrés G Belmonte, que podes ler íntegra aquí (en GaliciaFlow.com), dise do principal resposable do album, Alberto F. Escariz: “Alberto es Bad y Bad vuelve a ser Alberto porque incluso en los temas más enfocados hacia la competición (“Amor Umbilcal” te parte el cuello…), la impronta del
autor trasciende al propio personaje. Nada más difícil. Wow.”. Parabéns a Alberto, e aos compañeiros de 504 por este novo traballo!

Podes escoitar íntegro o album e brandcamp ou en youtube. Tamén podes descargar o traballo en mp3 acompañado de toda a artwork no teu ordenador.

OS PRECEDENTES
A polémica que arrastrou a estatua de Fraga cumpre xa uns cinco meses. As continuas modificacións no discurso que o alcalde foi introducindo para “salvar os mobles” neste tema foron relevantes. Primeiro, a idea da estatua partiu do Concello (que orixinalmente pensara en adicarlle unha rúa), así o confirmou o propio escultor no seu momento e así o reflectía a prensa. Logo, á vista da polémica, Aragunde falou de acudir a administracións para financiar a mesma, pero a resposta social (a saída a prensa en parte grazas á convocatoria -declarada ilegal- de concentración) fixo que Aragunde, un mes despois de que comezara a polémica, declarara que era un misterioso “sector do viño” quen promovía e financiaba a escultura. As propias adegas rexeitaban que a idea partira delas, excepto unha (Bouza de Carril, de Ribadumia). En todo o momento, na prensa e en pleno, Aragunde manifestou que ese misterioso “sector do viño” abrira unha conta bancaria para que “todos os veciños que quixeran” fixeran a súa aportación. Iso si, o número de conta nunca se fixo público abertamente, nin os misteriosos promotores. Logo veu a mobilización das estatuas humanas no verán, a colocación da estatua entre rexas, e a pintada de hai un par de semanas…pero iso xa é outra historia.

A CONTA BANCARIA

Manuel Noya Figueroa (cuarto pola dereita) nunha imaxe de hai anos publicada no Faro

Tanto misterio levou a moita xente a pensar que a conta realmente non existira. Pero aínda que existe a certeza, corroborada daquela polo propio Faro, de que o tema do “sector do viño” foi unha invención a posteriori, si é certo que existe tal conta bancaria. Descoñecemos canto se recaudou ou se se cumpriu co suposto prezo (descoñecido). Tamén se se pagou xa ao artista ou non. Pero grazas a un anónimo que tivo curiosidade por coñecer o fondo deste asunto, temos copia dun recibo bancario no que consta o número de conta e nome da persoa titular. A conta está en Novagalicia banco e o titular é Manuel Noya Figueroa, que fora presidente da “Sociedad Agraria de Transformación (SAT) da Agrupación de Cosecheiros de Albariño de Vilariño-Cambados”, o xérmolo do que finalmente foi a grande adega Martín Códax (que dito sexa de novo, rexeitou oficialmente vincularse coa iniciativa da estatua). Noya é parente directo dun concelleiro do Partido Popular, o seu fillo Manuel Noya Chaves, que foi edil (pincha no enlace para ver foto no blog “A ti meu Cambados”) durante varias lexislaturas.

CONCLUSIÓNS
1.- Sabemos desde hai meses que a conta bancaria foi unha artimaña que o Concello quixo empregar para xustificar a mala idea da estatua. Demostrouno o xornal Faro de Vigo nun claro artigo sobre  as versións contraditorias de Aragunde.
2.- A conta foi efectivamente creada, e salta á vista o vínculo co Partido Popular, o cal confirma aínda máis que a idea de creala vén dese entorno. As principais adegas, incluída Martín Códax, rexeitaron ter que ver co asunto. O “sector do viño” que sacou a relucir Aragunde está reducido, de momento, á adega Bouza de Carril e a Manuel Noya. Queda claro que a palabra “sector” se emprega a cotío moi lixeiramente. Aínda que polo menos, desde o PP tiveron a “delicadeza” de que fora unha persoa relacionada co viño a que abrira a conta.

NOTA LEGAL OU ALGO SEMELLANTE
Desde Cambados(tk) queremos ser totalmente escrupulosos coa confidencialidade da persoa que fixo o ingreso, e coa propia protección de datos, información bancaria, etc. Eses son motivos para non publicar o propio recibo, cuxa copia podemos garantir que si custodiamos (non publicaríamos algo deste xeito sen o material que o avale). Unicamente tentamos con esta publicación botar algo de luz a un tema que segue a ser demasiado escuro, e que non deixou aínda de ser polémico. Non o será, cremos, até que esa estatua desapareza do Pazo Torrado e do chan público de Cambados. Agora, polo menos, xa temos un nome ao que se lle podería devolver desde o Concello a escultura para que se garde no espazo privado que desexe(n).

Víctor Caamaño, a pesar de ter nacido en Noia, é cambadés, e aquí vive desde hai máis de corenta anos. Traballa como profesor no IES Francisco Asorey, na disciplina das ciencias naturais. A natureza é precisamente unha das súas paixóns, non en van é membro desde comezos dos noventa do Colectivo Ecoloxista do Salnés. Estas dúas ocupacións, ensino e natureza, levárono a participar na publicación de diverso material sobre o tema, destacando os magníficos libros da editorial A Nosa Terra. Tranquilo e cordial, dialogante, pero tamén firme nas súas conviccións. Foi candidato do BNG á alcaldía de Cambados en 2007 e 2011 e é o voceiro desta formación no noso Concello.

Que valoración do goberno fas deste ano e medio de lexislatura?
Estamos nunha crise moi forte, non só económica pero quizais o económico marca máis que outro tipo de cousas. Aínda que ás veces semella que todo isto está fóra da vida municipal, quero deixar claro que aquí neste ano e medio de lexislatura o goberno de Cambados o que fixo foi tratar de  trasladar esas políticas ao Concello, sexa con suba de impostos, sexa con privatización de determinados servizos, ou sexa simplemente aceptando o que che impoñen aínda que consideres que é inxusto. Por un lado, hai ese papel de sumisión ao que veña “de arriba”, e polo outro o papel de continuas meteduras de pata e postas en evidencia do alcalde que viña con outra imaxe e comprobamos que realmente no Partido Popular non importa quen sexa o alcalde; os modos e as formas son as mesmas. PREME EN “SEGUIR LENDO” PARA VER A ENTREVISTA COMPLETA Seguir lendo →

O Partido Socialista anunciara hai uns días que poñían en marcha a campaña de nadal adicada a recoller alimentos non perecedoiros en diversos puntos de Cambados para doar a Cáritas, e que estes chegaran ás familias en apuros para que todos teñamos un Nadal. Pois ben, tal e como apunta o blog de Xaquín Charlín “A ti Meu Cambados”, a voceira do PSdeG-PSOE denunciou boicot por parte do alcalde. Seguir lendo →

No Auditorio da Xuventude terá lugar a presentación do libro “Cambados” de Eduardo Baamonde. Baamonde é profesor pero ademais ten unhas dotes sobresaíntes para as artes, el mesmo confésase na súa web persoal un “amante do deseño gráfico e da pintura”. Entre as obras de Baamonde destacaría “Polo Salnés con Ramón Cabanillas” editado por CANDEA precisamente no 2009, ano adicado ao “poeta da raza”.

Neste “Cambados” editado por Faktoría K de Libros, o autor repasa a través das súas láminas o mellor da nosa vila. Pode ser un regalo excelente para calquera cambadés ou cambadesa, e especialmente para amigos doutros lugares para amosarlles dun xeito orixinal o noso Concello. Vén acompañado por un mapa co roteiro que o autor vai facendo graficamente pola vila. A presentación será este xoves 13 de Nadal a partires das 20 horas no auditorio. Organizan as librarías Contos e Cabanillas, onde podes atopar o libro se desexas adquirilo xa. Colaboran Concello de Cambados e Faktoría K, e presentará a Eduardo Baamonde un representante desta editorial: Chema Heras.

Hai un días coñecimos a moi mala nova de que Paradores, unha empresa dependente do Estado, aplicará un ERE a parte da súa plantilla. Nalgúns casos péchanse centros, noutros os Paradores só abrirán sete meses ao ano, e na maioría despídese a parte do persoal. Cambados está nese último grupo, con tres despidos sobre os pouco máis de trinta traballadores. Precisamente a ese extremo, ao non-peche do hotel da nosa vila, agarrouse Luís Aragunde para facer unhas declaracións moi desafortunadas ao Faro: “Dentro de lo malo, porque hay tres personas que van a quedarse sin trabajo, en Cambados estamos relativamente contentos”. Na mesma liña se expresou o presidente dos comerciantes, Marcos González. Non debían estar pensando no traballador de mantemento, nunha empregada de limpeza e no director do centro cambadés, que van perder o posto de traballo fundamentalmente pola mala xestión da alta dirección de Paradores, intimamente ligada ao goberno de turno, na actualidade ao Partido Popular. Os traballadores teñen claras sospeitas de que esta operación é a preparación a máis recortes e á privatización total ou parcial da empresa. Seguir lendo →

O Bloque Nacionalista Galego rexistrou varias preguntas sobre o colexio de Magariños. Nos últimos días fíxose público na prensa o malestar no profesorado polas malas condicións da pista cuberta, que fixo que anunciaran a súa intención de dar a clase de ximnasia na aula e mesmo non permitir aos alumnos empregar a pista no recreo polo risco de accidentes. O BNG lembra que no verán a Consellaría anunciou a inversión duns 386.000 euros no centro pero que a día de hoxe non invertiu 200 mil dos prometidos, nin están adxudicados. Tamén lle lembra ao Concello que é responsable do mantemento do centro, e que nos últimos anos reduciu esta partida. Víctor Caamaño pregunta a Aragunde que medidas acometeu o Concello para o mantemente do centro, tanto na súa cuberta principal como da pista deportiva. Tamén quere saber cal é a situación das obras prometidas polo conselleiro de Educación para a pista cuberta, e se ten a Xunta orzamento para acometelas. Do mesmo xeito pide coñecer a data na que serán acometidas as obras. Por último Caamaño pídelle ao alcalde que o Concello se implique ao máximo para solucionar esta problemática.

O PSOE pola súa banda rexistrou varias preguntas para o vindeiro pleno. Nunha delas, Fátima Abal fai constar a grande siniestralidade da estrada entre a rotonda de Vilariño e o polígono de Sete Pías, e pide coñecer que medidas se van aplicar para reducila. Tamén fai constar da falta de pasos de peóns para os rapaces que empregan o autobús escolar, e a pouca visibilidade dalgúns tramos, como no cruce do bar Vilariño. Por outra banda pregunta a portavoz do PSOE sobre as obras que están causando molestias na Rúa Sevilla (estase acometendo unha nova pavimentación) e na Rúa Vicente Risco. Tamén volven preguntar (xa non é a primeira vez) polo mal estado das instalacións do parque Torrado, como os aseos ou o propio parque infantil, que pode causar situacións de perigo para os nenos.

Fátima Abal ten dous fillos e vive no barrio de Fefiñáns. En 2011 concurriu ás eleccións municipais na candidatura do PSdeG-PSOE como número 3 e obtivo a acta de concelleira. Hai un par de meses pasou a ser portavoz municipal logo do inesperado pasamento de Rafael Blanco, que desempeñaba esta función trala renuncia de Domingo Tabuyo. Fátima comezou a participar en política ano e medio antes da súa entrada na Corporación, segundo ela dun xeito casual. “É que desde a casa non se cambian as cousas” díxolle un coñecido cando falaban do mal que vían a situación. E púxose a disposición dun partido baseado nuns principios cos que ela coincide. Para “botar unha man no que fixera falta”. CONTINÚA LENDO A ENTREVISTA PREMENDO EN “SEGUIR LENDO” Seguir lendo →

O alcalde de Cambados leva máis de cinco semanas sen responder ao escrito que entregamos o 26 de Outubro informándoo de que procederíamos a gravar os plenos da Corporación en audio e/ou vídeo. Transladábamoslle daquela que este materia sería usado para difundir o devir das sesións plenarias desde este blog a todos os interesados, e que numerosas sentenzas e informes avalan o dereito do cidadáns a gravar estes actos públicos. No documento, solicitámoslle ao rexedor explicitamente unha resposta, que a día de hoxe, máis de un mes despois, non chegou. Só coñecemos a posición do goberno local do PP por medio da prensa, que hai un mes reflectía que desde o PP estaban “fartos” de Cambados(tk) porque consideran que empregamos de forma sesgada as imaxes do pleno. Toda a polémica comezou cando no último pleno o señor alcalde interrumpiu o mesmo para sinalar que estaba “prohibido gravar” sen solicitalo previamente, a pesar de que nese momento CTK non estaba a rexistrar imaxes da sesión. Seguir lendo →

O xornal comarcal Diario de Arousa vén de acometer unha renovación moi profunda do seu espazo na web. Se até agora dos tres xornais da bisbarra pode ser que fora o que contaba cunha web máis rudimentaria, a partires de hoxe competirá con Voz e Faro quizais á súa cabeza. Coa versión vella existían bastantes problemas cos enlaces do Diario, posto que cambiaban cada día (é dicir, ao día seguinte as ligazóns apuntaban a outra nova), algo que agora está solucionado. Tamén contará cunha hemeroteca (neste sentido a páxina da Voz conta cun buscador moi potente con varios anos de información acumulada) e a navegación é moito máis amigable que até o de agora. Sen dúbida estamos ante un cambio para mellor. Anuncian que pronto contarán con espazo propio nas redes sociais.

Pola outra banda, o Faro mellorou nos últimos tempos a súa web ao incluír moitas máis novas comarcais nela, mentres a Voz fixo o contrario e só publica unha parte delas na rede. A outra parte pode ser consultada no xornal en papel ou adquirirse na rede previo pago (reducido, 0.79€). Porén, a Voz está a realizar un grande esforzo por integrar o audiovisual na súa web e agora publica novas tamén na sección Arousa a calquera hora do día, non limitándose a plasmar a edición de papel na rede senón a crear contidos específicos para internet.

O voceiro do BNG de Cambados, Víctor Caamaño, acompañado do seu compañeiro Xaquín Charlín, presentaron hoxe no rexistro dos Xulgados de Cambados unha denuncia polas presuntas irregularidades cometidas no piñeiral coñecido como “Pinal de Maza”. Este tema leva no debate político varios meses, trátase dunha actuación nunha grande parcela d’A Modia onde se talou unha grande masa forestal para plantar albariño. Este cambio de usos non sería presuntamente legal ao estar calificado o terreo como de protección forestal e non de uso agrícola. Ademais o BNG mantivo en todo momento que se levou a cabo un movemento de terras (hai fotografías que o proban) sen licenza urbanística. Todo isto coa peculiaridade de que son persoas vinculadas ao PP quen están detrás das obras: o concelleiro Juan Ramiro Gómez e o agora deputado do PP e ex alcalde Cores Tourís por medio da súa dona. Seguir lendo →

O mes de Novembro é coñecido xa no mundo como “Movember” pola iniciativa solidaria de deixarse medrar un mostacho co obxecto de que algunhas enfermidades que afectan aos homes, como o cancro de próstata, sexa visibilizadas. Os participantes máis puristas desta iniciativa comezan o mes totalmente afeitados e van perfilando o seu bigote até o último día.

En Cambados, o pub Rif-Rock adheriuse ao proxecto e este venres 30 celebra unha reunión de bigotudos. Para este local este tipo de festas non son novas, xa que desde hai catro anos convoca unha Festa do Bigote no verán, que fai coincidir co remate das Festas do Albariño, cun concurso de mellores bigotes “naturais” e postizos incluído.

María Jose Prado e Ana Louzao decidiron deixar de falar do que lles gustaría levar adiante e poñerse mans á obra. O seu gusto pola moda e polas tendencias levounas a abrir na rede un espazo para compartir as súas creacións e falar deste tema ao mundo. Conta coa implicación de membros da súa familia e incluso coa da deseñadora cambadesa Eva Soto Conde, que está a levar o nome de Cambados polas pasarelas de multitude de lugares. Seguir lendo →

O alcalde fixo declaracións hoxe a Radio Arousa – Cadea Ser, e atribuiu hoxe a unha “gamberrada” a transformación da estatua de Manuel Fraga no superheroe Superman, como vimos informando desde onte. Luís Aragunde relacionou o acto directamente coa mocidade, e chamou a atención que se repetira varias veces que veñen a Cambados mozos “de toda a comarca”, seguramente coa intención de non relacionar estes feitos coa polémica que arrastra a instalación da escultura desde hai semanas na propia vila. Desde o goberno local non lle queren dar importancia ao ocorrido: “hai que darlle o mesmo valor que se fora un banco ou a escultura de calqueira outro persoeiro”. Tamén indicaron na radio que o Concello xa intentou limpar a estatua pero non foi quen de facelo, e que se volverá a intentar. Escóitao todo premendo no botón do “play”.

Actualizado 27/11 Hoxe no Faro de Vigo o Concello anuncia que a Policía Local abriu “unha investigación” sobre o caso, aínda que Aragunde descarta que houbera motivacións políticas neste acto. A estatua parece que foi limpada, polo menos case na súa totalidade, por traballadores do Concello de Cambados. Isto a pesar de que en teoría a estatua foi sufragada por unhas persoas descoñecidas (só parace coñecelas o goberno local). É preciso manter o que reclamabamos onte: a estatua con ou sen pintura fóra dos terreos públicos de Cambados. Que lla devolvan aos promotores da homenaxe (se existen)!

O Centro de Información á Muller (CIM) leva todo este ano coas súas portas pechadas. O BNG considera este feito inaceptable, xa que aínda que apoia a decisión do goberno local de mancomunar o servizo con outros Concellos, ve totalmente erróneo paralizalo mentres non se leva esta cooperación a bo porto. Ademais, o Bloque sinala que isto leva acontecendo varios anos, nos que o CIM só funciona uns meses de cada exercicio. Segundo Víctor Caamaño, voceiro desta formación, hai dúas lexislaturas o Concello empregou o conflito do CIM politicamente contra a Xunta do bipartito, mentres que na lexislatura primeira de Núñez Feijoo o goberno local simplemente deixou de reivindicar e mantivo paralizado o servizo. Unha mostra, para o BNG, de que ao Concello lle interesa ben pouco este tema. Caamaño propón que o goberno local sufrague os custos do persoal mentres non reciba a subvención da Xunta, para non deixar a moitas mulleres sen esta ferramenta.

Cando en Maio se coñeceron os plans do goberno de Cambados de poñerlle unha estatua na vila a Manuel Fraga, a polémica estaba claramente servida. O propio PP, e o propio Aragunde, recurriu a mentiras e medias verdades sobre quen estaba detrás da iniciativa e sobre todo, quixeron levalo adiante pola vía do rodillo. Pero unha homenaxe dun pobo non pode ter éxito cando unha parte moi importante del está en contra; é máis, cando esa parte é non só ignorada senón que desprezada polos que gobernan. A oposición á estatua de Fraga fraguouse rapidamente fóra dos propios partidos políticos (aínda co seu apoio), na rede, o cal  puxo de manifesto que non se trataba dun simple tema de oposición municipal; e tivo como punto álxido unha acción de protesta cívica sen precedentes en Cambados (a ocorrida durante a inauguración do Albariño, que é quizais a máis orixinal das últimas décadas, e que contra todo pronóstico reuniu a arredor dun cento de persoas).

Tralo coñecemento de que a escultura de bronce que descansa entre rexas no Pazo de Torrado foi cuberta de pintura (non sen certa orixinalidade) é momento outra vez de reclamar que se retire do espazo público cambadés unha homenaxe coa que non concorda unha parte importante dos cidadáns. E sobre todo, que no caso de que non se revele a identidade dos autores da pintada (algo que parece xa probable) se acorde non destinar fondos públicos ao mantemento (limpeza, custodia, etc) da estatua. Hai que reiterar que se o goberno mantén que a iniciativa partiu dun grupo de viticultores (en tal caso moi reducido, como se demostrou hai meses), o Concello pode e debe devolverlles a estatua para que sexa colocada nos terreos privados destes ou onde eles consideren oportuno.

SEN REACCIÓNS POLO MOMENTO

O Concello de Cambados non emitiu no día de onte ningún comunicado, tal e como se desprende da ausencia de comentarios do gabinete de Aragunde na prensa, que si se fixo eco amplamente do sucedido (editado: xa houbo reaccións). A nova de CTK chegou outra vez a portada do dixital español Menéame, que redirixiu a esta web unhas 14.000 visitas até esta esta hora. Isto foi posible simplemente grazas a que unha veciña se puxo en contacto onte pola mañá connosco para comunicarnos os feitos e achegarnos a imaxe; lembra que ti tamén podes contactarnos polo email en cambadostk@gmail.com, ou persoalmente.
Anecdóticos un par de gazapos da prensa, un o da Voz que sinalaba que convertiran a Fraga en Spiderman (na edición dixital xa está corrixido) ou o de Terra, que sinala no pé de foto que se trata da “estatua de Franco”.

A estatua convertida en superheroe

Xa van alá case catro meses desde que a estatua a Manuel Fraga fora inaugurada (un pouco ás agachadas) por parte de cargos do PP no Pazo de Torrado ao final da Festa do Albariño. Trala polémica que espertou en Cambados esta homenaxe impulsada polo goberno local (aínda que logo atribuída por el a un “sector do viño” que aínda hoxe non sabemos ben quen é) a escultura foi colocada no Pazo de Torrado. Sorprendentemente, elixiron un lugar dobremente vallado para instalala, segundo o propio Faro de Vigo temeroso o propio goberno local de que sufrira algún “acto vandálico”. Pois ben, parece que as precaucións non foron suficientes. Seguir lendo →

Un intre da cea | Facebook Anova Meaño

A organización Anova – Irmandade Nacionalista reuniu onte  a boa parte dos seus membros do Salnés nunha cea celebrada en Dena. O encontro tivo por obxecto pasar unha noite de fraternidade e compañeirismo entre as persoas achegadas a este novo proxecto que naceu formalmente en Xullo e que electoralmente se estreou nas últimas autonómicas baixo a coalición Alternativa Galega de Esquerda (xunto con Esquerda Unida, Equo e Ecosocialistas). Alternativa obtivo nove representantes no Parlamento, sendo Juan Fajardo o deputado do Salnés desta nova entente da esquerda que xa é terceira forza política en Galiza con 200 mil votos. Os nove deputados de AGE xa formaron un grupo parlamentar en Santiago e comezaron a traballar, transladando a voz da cidadanía e dos movementos sociais á institución. A cea comarcal en Meaño prolongouse até ben entrada a noite nun moi bo ambiente. Anova está a implantarse en todos os Concellos desta comarca e celebra periodicamente asembleas abertas á cidadanía, nunha nova forma de artellar a política.

Unha das protestas das traballadoras | Ballesteros, La Voz

O conflito de Alfageme está na recta final e dá (lamentablemente) moitísimo do que falar. Nos últimos días o enfado das traballadoras foi monumental ao coñecer que o Igape declaraba deserto o concurso pola empresa, ao que concorreran tres empresas. Segundo a Xunta ningunha dela cumpría cos requisitos demandados, aínda que unha (El Consorcio) declaraba na prensa que iso non era certo. Descartado o concurso, o seguinte paso é a subasta xudicial por lotes, tanto das plantas industriais como das marcas. Esta saída non asegura nin moito menos a continuidade do proxecto e dos 150 postos de traballo. Os sindicatos cren que o conselleiro de Industria é culpábel da situación e mesmo ameazaron con presentarlle unha querela por prevaricación, xa que consideran que está a incurrir neste delito segundo eles pola total falta de decisión para resolver este conflito.

O BNG de Cambados levará ao pleno da Corporación deste Nadal unha moción na que pide aos Concellos da comarca que se impliquen para evitar a especulación cos terreos onde se atopa a empresa. Solicítanlles expresamente que non recalifiquen estes terreos. Por outra banda o BNG quere que o pleno de Cambados acorde esixir a demisión de todos os cargos políticos implicados neste proceso, moi especialmente do conselleiro de Industria.